داوەزین ناکاویگ نرخ دۆلار لە هەولێر
شەفەق نیوز/ نرخ دۆلار ئەمریکی وەرانوەر دینار عراقی، داوەزین وەرچەویگ لەی رووژەیلە وەخوەی دوینێد، ک نرخ ئاڵشتکردن ١٠٠ دۆلار ئەرا ١٤٥،٦٠٠ دینار عراقی داوەزێد.
شێروان تاهر خاوەن یەکیگ لە دوکانەیل ئاڵشتکردن پویلە لەناو بۆرسەی هەولێر ئویشێد: نرخ دۆلار یە ماوەی درویژیگە لەبان ١٤٨،٠٠٠ دینار چیگیر بویە، باوجی لەی رووژەیلە داوەزین ناکاویگ وەخوەی دی، ک نرخ ١٠٠ دۆلار ئەمریکی ئەرا ١٤٥،٦٠٠ دینار عراقی داوەزێد، و مەزەنە هەس لەی رووژەیل بانانە زیاتر داوەزێد.
وتیش: هوکارەگە هاوردن بڕەیل پویل گەورەیگ لە بانک ناوەندی ئەرا بازاڕەیلە، ک هیشت نرخی وەناکاوەو داوەزن، وەگەرد چاوەیلیگ لەناو مەردمەگە ک باس ئەگەر داوەزینیگ زیاتر کەن، ک هیشت خاوەن دوکانەیل ئاڵشت کردن سەر لەلیان بشیوەیەێد.
لەلای خوەییش، ئەرشەد محمد پسپۆڕ ئابووری ئەرا ئاژانس شەفەق نیوز وت: چەن هوکاریگ هانە پشت ئی داوەزین ناکاویە، زاقتریان دروسکردن حکومەت نوو عراق و ئەو چاوەیلە ک وەگەردی تیەن لە تەقەلای ئەرزانکردن نرخ خەرج دۆلار، وەگەرد نزیکەوبوین بڕیارداین بوودجە لەلایەن پەرلەمان عراق.
