دەسگیرکردن پیاییگ لەناو یەکیگ لە کەمپەیل ئاوارەیی کوردستان ژنەی خوەی کوشتیە

شەفەق نیوز/ وەڕیەوبەرایەتی پولیس ئاکرێ، ئمڕوو سێشەممە، دەسگیرکردن پیاییگ راگەیان، وە توومەت کوشتن ژنەی خوەی لەناو کەمپ ئاوارەیی ماملیان لە ناحیەی گردسين.

وەڕیەوبەرایەتیەگە لە بەیانامەیگ رەسیە ئاژانس شەفەق نیوز وت: لێکۆڵینەوەی سەرتایی نشان دەێد کە قوربانیەگە وەناو (ل. م. ي) لە تەمەن 29 ساڵان، و شویەگەی توومەتبارە، وەناو (ئ. ح. ع)  لە تەمەن 37 ساڵان، وەلێ مدووەیل تاوانەگە هیمان نادیارن.

دیاری کرد کە لێکۆڵینەوە وەردەوامە، کە تەرم قوربانیەگە ئەرا پزشک دادوەری لە دهۆک کلکریا، و لاپەڕەی پرسیگ لەبان توومەتبارەگە وەگورەی مادەی 406 لە یاسای سزادان عراقی واز کریا.