خەڵک سلێمانی ئامادەکاری ئەرا ئاهەنگ سەرساڵ کەن و حکومەت ناوخوەیی ئویشێد پویل ئاهەنگ نەیریمن.. وینە
ئارام شوان قسەکەر فەرمی وەریەوبەرایەتی گەشتوگوزار لە پارێزگای سلێمانی ئەرا ئاژانس شەفەق نیوز وت: لەوەر نەوین هویچ بڕە پویلیگ ئەرا ئامادەکاری ئەرا جەژن سەرساڵ زایینی لەی ساڵە، ئەراوە هویچ ئاهەنگیگ یا ئامادەکاری حکومەتی نییە، چوینکە حکومەت خویچ پویلیگ ئەرا ئامادەکاری ئەرا جەژن سەرساڵ و جەژنەیل رەمەزان و قوربان تەرخان نەکردیە.
شوان وتیش: هەر ئامادەکارییگ ئەرا هەر بوونیگ واتە پویل ئەرا جویلەکردن و هامشوو ئەرا شوینەیل گەشتوگوزاری و فڕۆکەخانەیل و پۆستەر هوشیاری و پرۆپاگەندە خوازێد، ک لەوەر نەوین پویل هویچ چالاکییگ ئەرا ئەو بوونەیلە وەپیمان نیەکریەێد.
لەباوەت سیمایل ئەو ئاهەنگە ک بەشیگ لە جادەیل پارێزگای سلێمانی وەخوەی دوینێد، قسەکەر فەرمی وەریەوبەرایەتی گەشتوگوزار لە سلێمانی وت: ئەوە کار مەردمە و حکومەت هویچ پەیوەندییگ وەپیان نەیرێد لەوەر ئەو هوکارەیلەگ باسیان کریا.
هەرلیوا، سەرچەوەیگ لە سەرۆکایەتی شارەوانی پارێزگای سلێمانی، ئمڕوو سێشەممە، ئەرا ئاژانس شەفەق نیوز وت: سەرۆکایەتی شارەوانی ئەوەسا وەگورەی توانای خوەی ریکارەیل ئامادەکاری جیوەجی کەێد باوجي تا ئیسە نیاز سازین ئاهەنگیگ ناوەندی و حکومەتی وە بوونەگە نییە.
لەلای خوەییش؛ هاووڵاتی بەرزان ئەحمەد ئەرا ئاژانس شەفەق نیوز وت: ئاهەنگ ساڵ نوو لە ساڵەیل گوزەشتە جیوازە، و ئیمە چاشیایمنە ک گشت ساڵیک لەناو جادەی سالم ناوڕاس شارەگە گردەو بویمن، تا لەو ئاهەنگ فەرمیە وەلایەن پارێزگاگە بەشداری بکەیمن.
ئەحمەد دیاری کرد ک ئاهەنگ ئەمساڵ تاکانەس، و مەزەنە کرد خەڵکەگە بچنە جادەی سالم تا خوەشی خوەیان وە ساڵ نوو نشان بیەن، هەرچەن قەیران ئابووری هەس.
لەلای خوەییش: هۆراس ئەحمەد خانمە هاووڵاتی وت: هەرچەن ئاهەنگیل فەرمی لەوەر قەیران دارایی پویچەڵ کریانە، باوجی ئەوەسا پارێزگاگە ئاهەنگیل گەپیگ لە هۆڵ و شانۆەیل شەو سەر ساڵ وەخوەی دوینێد، و باس ئارەزووی کرد ک ئاشتی و ئارامی لە گشت ناوچەیل هەرێم کوردستان و عراق بوود.
هۆراس خان باس ئومید خوەی کرد ک ساڵ نوو باێدەو و برایلکان لە کووچبەرەیل مەسیحی ئەرا میلکان و ناوچەیل خوەیان گلەو بخوەن، وەتایبەت ک ئەوان ئطمساڵ دویر لە میلکانیان ئاهەنگ کەن.
پەیامنێر ئاژانس شەفەق نیوز لە سلێمانی دیاری کرد ک سیمایل ئاهەنگ جەماوەری لە پارێزگای سلێمانی، هەر لە پانزەی کانوون یەکەم دەسوەپی کرد، ئەوەیش وە بڵاوکردن ئەڵڕازین و چراخ لە جادە و شوینەیل گشتی وەگەرد ئامادەکردن دار زایینی و دیاریەیل پاپا نوێل.
