٥ باوەت هابان مێز دانیشتن هەفتانەی حکومەت هەرێم کوردستان

٥ باوەت هابان مێز دانیشتن هەفتانەی حکومەت هەرێم کوردستان
2021-05-05T09:31:56+00:00

شەفەق نیوز/ حکومەت هەرێم کوردستان، لەناو دانیشتنەگەی ک بڕیارە لە وەختیگ ئایندە لە ئمڕوو چوارشەممە ئەنجام بەێد، گفتوگۆ لەبان پەنج باوەت کەێد.

فەرمانگەی راگەیانن و زانیاریەکان سەروە ئەنجومەن وەزیران لە بەیاننامەیگ رەسیە ئاژانس شەفەق نیوز وت: دانیشتنە هەفتانەگە باس رەشنووس پڕۆژەی ستراتیژی نیشتمانی ئەرا نواگردن گەندەڵی لە هەرێم کوردستان کەێد، و وەردەوامی لە باسکردن پڕۆژەی یاسای بوودجەی هەرێم کوردستان ئەرا ئی ساڵە.

هەمیش دانیشتنەگە هەلکردن پڕۆژەی یاسای(کۆمپانیایل ئەمنی تایبەت لە هەرێم کوردستان)، و پڕۆژەی یاسای راسکردنەوەی یاسای وەزارەت دارایی و ئابووری لە هەرێم، و راپۆرت تایبەت وە رەوشەیل پێکهاتەیل  وەخوەی دوینێد.

Shafaq Live
Shafaq Live