بارزانی و بلاسخارت لەبان چارەسەرکەردن گرفتەیل هەولێر و بەغداد وەگورەی دەستور رێک کەفن
شەفەق نیوز/ مەسرور بارزانی سەرۆک حکومەت هەرێم کوردستان، ئمڕوو یەکشەممە، وەگەرد جینین بلاسخارت نۆێنەر نەتەوە یەکگرتووەکان رێک کەفتن لەبان چارەسەرکەردن گرفتەگان لەناوبەین بەغداد و هەولێر وەگورەی دەستور.
سەرۆکایەتی حکومەت هەرێم کوردستان لە بەیاننامەیگ رەسیە ئاژانس شەفەق نیوز وت: مەسرور بارزانی سەرۆک حکومەت هەرێم کوردستان، ئمڕوو، پێشوازی لە جینین بلاسخارت نۆێنەر تایبەت ئەمیندار گشتی نەتەوە یەکگرتووەکان لە عراق کرد، و دیاری کرد ک لە کۆبونەوەگە باس لە دویاترین گەشەیل رەوشەگە لە عراق کریا، و هەمیش دویاترین نووەوەبویەگان لە دانووستانەگان ناوبەین حکومەت هەرێم و حکومەت فیدڕاڵی، و شیوەیل چارەسەرکەردن گرفتەگان لەناوبەین هەردوگلا، وەتایبەت چەسپانن بەش هەرێم کوردستان لە بوودجەی فیدڕاڵی ئەرا ساڵ ٢٠٢١.
وەگورەی بەیاننامەگە، هەردوگ لایەنەگە رێک کەفتن لە گرنگی چارەسەرکەردن گرفتەگان لەناوبەین هەرێم و حکومەت فیدڕاڵی لە چوارچێوەی دەستور، و مسۆگەرکردن ماف و شایستە داراییەگان ئەرا هەرێم کوردستان.
لە تەوەریگ تر لەناو کۆبونەوەگە، بەیاننامەگە وت؛ دووپات لە گرنگی جیوەجیکردن رێککەفتنەگەی شەنگال جوور خوەی کریا، ئەرا چەسپانن ئاشتی و ئارامی لە ناوچەگە.
