ئاسایش سلێمانی باندیگ دزیکردن دەسگیر کەێد پڕتاڵ سەربازی پووشن

شەفەق نیوز/ وەڕیەوبەرایەتی ئاسایش سلێمانی، ئمڕوو دووشەممە، دەسگیرکردن باندیگ دزیکردن راگەیان کەسەیلیگ پڕتاڵ سەربازی پووشن، ئەوەیش دویای ٨ رووژ لە دزیکردن ماشینیگ.

وەڕیەوبەرایەتیەگە لە بەیاننامەیگ رەسیە ئاژانس شەفەق نیوز وت: لە رووژ 15/1/2023 ماشینیگ مارکەی (تویوتا هایلۆکس) لە سلێمانی دزیا، و دویای ئاگادارکردن وەڕیەوبەرایەتی ئاسایش سلێمانی، و دەسکردن وە لێکۆڵینەوەی گشتگیر ئەرا ناسین تاوانکارەیل، هیزەیلمان لە رووژ 21/1/2023، گشت تاکەیل باندەگە لە سلێمانی و سەید سادق دەسگیر کردن.

 وتیش: توومەتبارەیل پڕتاڵ سەربازی پووشینە و چەک بیمووڵەت وەپیان بویە، و دیاری کرد ک ئەو کەسەیلە دەسیان لەناو دزیەیل وەرینیگ بویە.

وتیش: وەگەرد دزیکردن ماشینەگە، تاکەیل باندەگە تابلۆی ماشینەگە و شیوەی دەیشتی ئاڵشت کردنە، و دویای دەسگیرکردنیان و دەسناین وەبان ماشینەگە، گشت ئەندامەیل باندەگە خریانە وەردەم دادپەروەری، وتیش: ماشینەگە گلەو دریا ئەرا خاوەنی.