پیکاتەیل کوردستان: نێچیروان بارزانی رەنج فرەیگ دا تا کۆتا بارێدەو
مەعرووف لە کۆنگرەیگ رووژنامەوانی هاوبەش لە هەولێر وەرد نوێنەرەیل پیکاتەیل لە هەرێم کوردستان وت: ئیمەی نوێنەرەیل پیکاتەیل پشتگیری لە کەسەیلە کەیمن کە لەی ماوەی دویاییە پاڵپشتی مەنین سیستم کۆتا لە پەرلەمان کوردستان کردن.
وتیش؛ کورسییەیل کۆتا وە یاسا دانریاس، و خوەی مافیگ سروشتیە تایبەت وە پیکاتەیل، وە دیاریکریای ئەو پیکاتەیلە کە هانە هەرێم کوردستان، و بەشداریکردن لە هەڵوژاردن فیدراڵی.
مەعرووف باس بەشداریکردن پیکاتەیل لە هەڵوژاردن وە کاریگ گرنگ کرد، وتیش: یەسە کە لە عراق بوود، وەلێ هەڵوەشانن ئی سیستمە لە هەرێم کوردستان نیگەرانی دروس کەێد، و ئەو بڕیارە کە لە دادگای فیدراڵی دەرچگ، بڕیاریگ سیاسی بوی.
وتیش: ئەو دیدارەیلە کە لە بەغدا لە سەردانەگەی نێچیروان بارزانی سەرۆک هەرێم کوردستان ئەنجام دریان، کە ئەرا پەیوەندییەیل ناوەین هەولێر و بەغدا بوی، لە بەشیگ لەلی باس هەڵوژاردن پەرلەمان کوردستان و سیستم کۆتا لەناویان کریا.
هەمیش وت: ئەو لایەنەیلە کە بەشدارن لەو دیدارەیلە، پاڵپشتیکردن خوەیان ئەرا سیستم کۆتا نشان دان، و ئیمەیش گەشبینی لە گلەوخواردنی و بەشداریکردن نوێنەرەیلیان لە هەڵوژاردن پەرلەمان هەرێم کوردستان دیریمن.
دیاری کرد کە وە بەرز نرخدار هەڵوێست سەرۆک هەرێم کوردستان نێچیروان بارزانی کەیمن، کە تەقەلای فرەیگ دەێد، و رەنج فرەیگ کیشێد ئەرا گلەوداین سیستم کۆتا ئەرا هەڵوژاردن هەرێم.
