ئاگرەگەی کریستال هەولێر.. وەرگری شارستانی کپیەو کەێد و ئاشکرای هووکارەیلی کەێد
شەفەق نیوز/ سەرکەوت کارش قسەکەر وەرگری شارستانی هەولێر، ئمڕوو شەممە، ئاشکرای بڵویزەکردن ئاگر ناو چیشتخانەی یەکیگ لە هوتێلەیل شارەگە ئاشکرا کرد، وەگورەی لێکۆڵینەوەی سەرەتایی.
کارش ئەرا ئاژانس شەفەق نیوز وت: وەگورەی لێکۆڵینەوەیل سەرەتایی، ئاگرەگە مەوقەی ئامادەکردن خواردن لەناو چیشتەخانەگەی هوتێل کریستال هیز گردیە، و وەزوی بڵوێزە کردیە، و چیشتەخانەگە وتەواوی سزانیە.
وتیش: توەنستیمن وە ١٢ تیم وەرگری شارستانی ئاگرەگە کپەو بکەیمن، و خوەشبەختانە ئاگر نەڕەسیە بوتڵەیل گاز، و زەرەدیگ گیانی نەویە.
لەلای خوەییش، محمد سمیدی وەڕیەوبەر گشتی هوتێل کریستال وت: کپەوکردن ئاگرەگە وە دەسمیەتی وەرگری شارستانی و جیوەجیکردن ریسگایل بیوەیی بوی، و چووڵکردن هۆتێلەگە لە میوانەیلی، و هویچ زەخمداریگ توومار نەکریا.
سمیدی ئەرا ئاژانس شەفەق نیوز وت: هوتێلەگە ئەوەسا دووارە کەفێدە کار، دویای بڕین کارەبا لە گشت شوینەیلی، و دووپاتکردن لە مەرجەیل بیوەیی، تا لە جارانی خاستر بوود.
شەوەکی ئمڕوو، ئاگر لەناو یەکیگ لە چیشتەخانەیل هوتێل (تۆپ ئۆرکانیک) لەناو هوتێل کریستال لەبان جادەی سەدی لە شار هەولێر هیز گرد، تا وەزوی تیمەیل وەرگری شارستانی کپەو کردن.
