چواره‌مين مناڵ داعشى له عراقه‌و ئه‌را ئه‌ڵمانيا جيواز كريا
2019-08-26T17:50:27+00:00
شه‌فه‌ق نيوز/ حكومه‌ت ئه‌ڵمانى چواره‌مين مناڵ داعشى له عراقه‌و جيواز كرد ئه‌را وڵاته‌گه‌ێ، ك وه‌گووره‌ى سه‌رچه‌وه‌يل ئه‌ڵمانى مناڵيگ شيره‌خوه‌ر بويه‌و وه ئه‌مبوڵانس ئاسمانى جيواز كرياگه.
وه‌گووره‌ى سه‌رچه‌وه‌يل ئه‌ڵمانى، سۆفيا ئه‌و مناڵ شيره‌خوه‌ره ك رووڵه‌يل خيزانه‌يل داعشى بويه ته‌مه‌نى 10 مانگ بويه وه‌ل سێ مناڵ تر يه‌تيم له كه‌مپ په‌نابه‌ره‌يل ئه‌هۆل له سوريا ئه‌را كوردستان عراق جيواز كريانه له‌وه‌ر ئه‌وه‌گ حاڵه‌ت ته‌ندروستيى سه‌قامگير بدێ و دوياخريش جيواز كرياگه ئه‌را ئه‌ڵمانيا.
جى باسه، زويتريش سێ مناڵ له رووڵه‌ێ چه‌كداره‌يل ريكخرياگ تيرۆريستى داعش له شار هه‌ولێر عراقييه‌و جيواز كريان ئه‌را فرانكفۆرت، ك يه‌يش يه‌كه‌مجار بوێ حكومه‌ت ئه‌ڵمانى مناڵ داعشيه‌يل جيواز بكا.
