وینە.. عراق مەرز مەنزەریە ئەرا زیارەتچیەیل ئیرانی واز کەێد
شەفەق نیوز/ سەرچەوەیگ وەرپرس لە دیالە، ئمڕوو شەممە، وازکردن مەرز مەنزەریە لەنوای زیارەتچیەیل ئیرانی راگەیان، ک ئەرا زیارەت چلەی ئیمام حسێن تیەنە ناو عراق.
کۆنگرەیگ رووژنامەوانی لەلایەن دەزگای مەرزەیل سنووری لەباوەت وازکردن مەرز مەنزەریە ئەنجام دریا، ئەوەیش وە ئامادەبوین نوینەر دەزگای مەرزەیل سنووری عەلائەدین قەیسی، و لیوا شێرکۆ ئەحمەد وەڕیەوبەر مەرز مەنزەریە، و ئاژانس شەفەق نیوز ئامادەی بوی، و باس شیوەی وەناوهاتن زیارەتچیەیل وەرو کەربەلا کریا.
کۆنگرەگە باس ریکارەیل ئەمنی لە مەرز مەنزەریە و پیشوازیکردن وە زیارەتچیەیل کریا، ک ئەرا چلەی ئیمام حسێن روی وەرەو کەربەلا کەن، هەمیش باس ئامادەکاری ئەمنی لە کەرت دیالە.
سەرچەوەگە ئەرا ئاژانس شەفەق نیوز وت: تا ئیسە زیاتر لە چوار هەزار زیارەتچی لە مەرز مەنزەریە هاتنەسە ناو، وتیش: جویراجویر چینەیل هیزە ئەمنیەیلە و حەشد شەعبی بڵاو بوینە، ئەرا ئارامکردن هاتن زیارەتچیەیل.
سەرچەوەگە دووپات کرد؛ لە رووژەیل بانان زیارەتچیەیل فرەیگ تیەنە ناو، هاتێ شمارەیان بڕەسێدە ١٢ هەزار کەس.
