وەماوەی نیم رووژ.. کوشیان و زەخمداری ١٥ کەس وە رویداودیل هاتوچو لە دیالە
شەفەق نیوز/ سەرچەوەیگ ئەمنی لە دیالە، ئمڕوو دووشەممە، خەوەردا لە کوشیان و زەخمداری زیاتر لە ١٥ کەس وە رویداوەیل هاتوچو لە ناوچەیل جیاجیا وەماوەی ١٢ ساعەت گوزەشتە.
سەرچەوەگە ئەرا ئاژانس شەفەق نیوز وت: ٥ مەدەنی لە رویداویگ ناوبەین دوو ماشین لەبان ری موقدادیە-بەعقوبە زەخمدار بوین، و دوو کەسیش لە رویداویگ ناوبەین دوو ماشین لەبان رییگ لە دەورگرد ناحیەی بەعقوبە زەخمدار بوین، وتیش: زەخمدارەیل ئەرا خەسخانەی بەعقوبە بریان، و دەسەڵاتەیل ئەمنی لێکۆڵینەوە لە رویداوەگە واز کردن.
لە رویداویگ دڵتەزن، خود سەرچەوەگە وت: لەلای کەمەو ٩ مەدەنی لە کوشیان و زەخمداری کەفتن، لە رویداویگ هاتوچو ناوبەین چەن ماشینیگ لە ناوچەی چوارڕیان "جورف ملح" لە باکوور خوەرهەڵات بەعقوبە.
سەرچەوەگە دووپات کرد ک رویداوەگە بویە هووکار ویرانکردن بڕیگ ماشین ک لەیەکدان، و تا ئیسە وە شیوەی هویردیگ شمارەی قوربانی و زەخمدارەیل نەزانیایە.
