وە دووپاتکردن خەوەر شەفەق نیوز - زەیدی دەس کەێدە گەشتە کەنداوییەگەی وە سەردانکردن سعودیە
شەفەق نیوز - بەغداد
عەلی فالح زەیدی، سەرۆک ئەنجوومەن وەزیرەیل، ئمڕوو چوارشەممە، رەسیە رياز پایتەخت لە سەردانیگ فەرمی ئەرا شانشین عەرەبی سعودی.
سەرچەوەیگ حکومەتی ئاگادار لە دەهەمین رووژ لە مانگ تشرین یەکەم ئیسە راگەیانۊ کە زەیدی، رووژ چوارشەممە 14ي مانگ، گەشتیگ کەنداوی ئەنجام دەێد کە شانشین عەرەبی سعودی گرێدەو، و دۊای ئەوەیش روی وەرەو دەوڵەت کوەیت کەێد.
سەرچەوەگە لەو وەختە ئەرا ئاژانس شەفەق نیوز وت، کە زەیدی وەرد دەوڵەتەیل کەنداو باس لە دۆسیە ئەمنی و ئابوورییە هاوبەشەیل کەێد، و هەرلیوا رەوش ناوچەگە و کاریگەریی لەبان رەوشە ئەمنی و ئابوورییەیل، بیجگە لە باوەتە هاوبەشەیل لەبان ئاستە جویراجویرەیل.
سەرچەوەگە رووشنەو کرد، کە زەیدی لە گەشتەگە دووپات کەێد لە رەتکردن عراق ئەرا هەر پەلاماریگ کە لە خاکەیلییەو وەرەو هەر یەکیگ لە دەوڵەتەیل کەنداو و ناوچەگە ئەنجام بیریەێد، و حکومەتەگەی کەمتەرخەمی نیەکەێد لە پرسیارکردن لە هەر لایەنیگ کە دەسی لەناو ئیجۊر ئۆپەراسیۆنەیل لە سنوورەیل بوود.
ئی گەشتە دۊای هەڵوەشانن سەردانیگ تیەێد کە بڕیار بۊ زەیدی ئەرا ریاز ئەنجامی بەێد لە مانگ تەمموز گوزەشتە، وە مدوو پێشهاتە ئەمنییە خێراگان لە ناوچەگە.
پەیوەندییە عراقی - کەنداوییەیل رەوشیگ لە چەوڕیبۊین و وریایی وەخوەیانەو دۊنن لە وەخت دەسکردن ئۆپەراسیۆنە سەربازییە هەرێمییەیل لە مانگ شوبات 2026ەو، لە ناوڕاس توومەتەیل دووپاتکریاگ لەلایەن دەوڵەتەیل ناوچەگە ئەرا گرووپە چەکدارەیل وە وەکارهاوردن خاک عراق ئەرا جیوەجیکردن پەلامارەیل وە فڕۆکەی بیفڕۆکەوان کە بەرژەوەنییە ئابوورییە هەرێمییەیل کردنە ئامانج.
