هيزه‌يل ئه‌منى له خوه‌رهه‌ڵات سه‌ڵاحه‌دين بۆردومان داعش كردن و بڕيگ له‌ليان كوشتن
شه‌فه‌ق نيوز/ سه‌رچه‌وه‌يل ئه‌منى له پاريزگاى سه‌ڵاحه‌دين ئاشكراى كوشيان شماره‌يگ له تيرۆريسته‌يل داعش كردن له پرووسه‌يليگ ئه‌منى و بۆردومانكردنيگ له ده‌ورگرد قه‌زاى خورماتوو له خوه‌رهه‌ڵات پاريزگاگه.
له‌ى باوه‌ته‌و، سه‌رچه‌وه‌يگ ئه‌منى ئه‌را شه‌فه‌ق نيوز وت: هيزيگ له هه‌واڵگيرى ليواى 3 له تيم جواودانه‌وه‌ى گورج وه هاوكارى وه‌ل ده‌زگاى ئه‌من نيشتمانى تويه‌نستنه شماره‌يگ له تيرۆريستيل داعش بكوشن و ده‌س بگرنه بان ماتۆڕسكڵيگ و بڕيگ چه‌ك و ته‌قه‌مه‌نى له ناوچه‌ى قه‌ره‌جاى له قه‌زاى خورماتوو له خوه‌رهه‌ڵات سه‌ڵاحه‌دين.
لاى خوه‌ييشه‌و عه‌لى هاشم قسه‌كه‌ر وه‌ناو سه‌ركردايه‌تى محوه‌ر باكوور حه‌شد شه‌عبى ئاشكراى كوشيان شماره‌يگ داعشى كرد له بۆردمانيگ ك داعش كرده‌سه ئامانج له باكوور خوه‌رئاواى خورماتوو.
هاشم ئه‌را شه‌فه‌ق نيوز وت: تووپخانه‌ى حه‌شد تيرۆرسته‌يل داعش له نزيك ته‌ياره‌خانه‌ى حلێوه و ده‌ورگرد ناوچه‌ى زه‌رگه له باكوور خوه‌رئاواى خورماوو بۆردومان كردگه‌و له‌و بۆردومانه شماره‌يگ تيرۆريست كوشيانه‌و شماره‌يگيش زه‌خمدار بوينه.
