هەڵمەتیگ هەفت رووژە.. تەندروسی عراق کوتان دژە سورێژە ئەرا زیاتر لە 5 ملیۆن مناڵ کەێد (وینە)
2024-04-23T13:10:32+00:00
شەفەق نیوز/ وەزارەت تەندروسی، ئمڕوو سێشەممە، ئاشکەرایکرد تا رووژ دویکە دووشەممە زیاتر لە 5 مناڵ کوتان ئەرایان کریایە دژ وە بیماری سورێژە.
قسەکەر فەرمی وەزارەتەگە سەیف بەدر وە ئاژانس شەفەق نیوز وت "هەڵمەت کوتانەگە دژ وە بیماری سورێژە کە وەزارەت تەجدروسی دەسوەپی کردیە ماوەی دە رووژ وەردەوامە، لە دویای هەفتەم رووژ شمارەی ئەو مناڵەیلە کوتان ئەرایان کریاس رەسیە 5 مليۆن و400 هەزار مناڵ".
دووپاتکرد "هەڵمەتەگە تا رووژ پەنجشەممەی ئایندە وەردەوامە ئەرا وەجیهاوردن ئامانج پلانکریاگ کە کوتان زیاتر لە 7 ملیۆن مناڵە لە تەمەن مەکتەو سەرەتایی و باخچەی مناڵان".
وەزیر تەندروسی ساڵح مەهدی حەسناوی داوا لە گشت خێزانەیل عراقی کەێد هاوکاری تیمەیل وەزارەت تەندروسی بکەن ئەرا کوتان مناڵەیلیان دژ وە سورێژە کە گشت کوتانەیل وە لایەن وەزارەت تەندروسی پەسەنکریاگ و تەندروس و کاریگەرن لە سەرچەوەی ناودەوڵەتی جی متمانەس".
