ئەنبار.. باوگیگ دویەت خوەی کوشێد و لەناو ماڵ نەێدەی خاک
2024-08-17T15:13:24+00:00
شەفەق نیوز/ پولیس پارێزگای ئەنبار، ئمڕوو شەممە، ئاشکرای تاوان کوشتن دویەتیم وەدەس باوگی کرد کە لەناو ماڵەگە ناسەی خاک.
پولیس لە بەیاننامەیگ رەسیە ئاژانس شەفەق نیوز وت: کویای توومارکردن ئاگاداری لەبان بیسەروشوینی دویەتیگ لە ناوچەی زەنگورە (قوتنیە) وەلایەن کەسوکارەیلی، کە داڵگ دویەتەگە داوای سکاڵا لەبان کوڕ و دویتەزای خوەی کرد، و لە دویای گردەوکردن زانیاری و وەشکین ماڵ توومەتبار، تەرم قوربانیەگە وە کوشیای پەیا کریا، کە لەناو ژووریگ بویچگ نریاسە خاک.
وتیش: تیمیگ لە ئەفسەرەیل بەش تاوانەیل رەمادی و بنکەی پولیس زەنگورە دروس کریا ئەرا رەسین وە بندروس رویداوەگە، تا تاوانبارەیل دەسگیر بکریەێد.
