مردن و زەخمداری وە سێ رویداو هاتوچو لەبان ری ناودەوڵەتی لە باشوور عراق
2024-04-14T08:48:57+00:00
شەفەق نیوز/ سەرچەوەیگ ئەمنی لە زیقار باشوور عراق، ئمڕوو یەکشەممە، خەوەردا لە توومارکردن 3 رویداو هاتوچو لەبان ری ناودەوڵەتی خێرا خوەرئاوای شار ناسڕیە ناوەن پارێزگاگە.
سەرچەوەگە وە ئاژانس شەفەق نیوز وت، "لە ری ناودەوڵەتی خێرا ناوەین زیقار و بەغداد سێ رویداو هاتوچو توومارکریا لە ئەنجام دوو کەس گیان لەدەسدا کە یەکیگیان ئەندام لە حەشد شەعبی و 6 کەسیش زەخمداربوین".
سەرچەوەگە وتیش "قوربانی و زەخمدارەیل خەڵک پارێزگای بەسڕە و کەربەلان" ئاشکەرایکرد "هێزە ئەمنیەل ئاخڵەی شوین رویداوەگە دانە، زەخمدارەیلە ئەرا نزیکترین خەسخانە کلکردنە ئەرا چارەسەرکردن و قوربانیەیلیش ئەرا پزیشک دادوەری بریان".
