مردن دوو کەس و دراوردن تەرمیگ و زەخمداربوین وە رویداوەیليگ لە زیقار
2023-07-11T07:41:24+00:00
شەفەق نیوز/ سەرچەوەیگ ئەمنی لە پارێزگای زیقار، ئمڕوو سێشەممە، خەوەردا لە توومارکردن شمارەیگ رویداو ئەمنی لە پارێزگاگە لەناوبەینی زەخمداری فەرمانبەریگ لە وەزارەت داد وە مەرافەیگ هووزانە، و مردن و زەخمداری هاوڵاتیەیلیگ وە رویداو هاتوچو.
سەرچەوەگە وە ئاژانس شەفەق نیوز وت، " ماشینیگ پلیایە لەبان ری گشتی ناسڕیە و رەفاعی، رویداوەگە بویە مدوو مردن کەسیگ و زەخمداری سەختیگ دوو کەس".
سەرچەوەگە وتیش " رویداو تلانن لە نزیک خواردنگەی حەورا لەبان ری خێرا لەناوڕاس ناسڕیە رویدایە، بویە مدوو دەسوەجی گیان لەدەسدان کەسیگ، تاوانبارەگە ئەرا شوین نادیاریگ وایە".
سەرچەوەگە وتیش،" دەزگایەیل ئەمنی توەنستنە تەرم هاوڵاتییگ بیس ساڵان درارن لەناو چەم غەراف لە قەزای نەسڕ باکور پارێزگاگە".
هەمیش، مەرافەیگ هووزانە لەناوبەین ئەندامەیل هووز ئەلبو زیادە دروسبویە، مەرافەیل ناوبەین هەردگ لا بویەسە هوکار رویداو زەخمداربوین فەرمانبەریگ ک لە زیندان ناسڕیە (حووت) سەر وە وەزارەت داد کارکەێد، وەپای سەرچەوەگە.
