لە چوار رووژ سەرەتای مانگ تەمووز خوەڵوارین ئاست نووڕستن کەمەو کەێد

شەفەق نیوز/ دەسەی کەشناسی و زەویلەرزەیل عراق، ئمڕوو پەنجشەممە، راگەیان وە هووکار خوەڵوارین لە چوار رووژ سەرەتای مانگ تەمووز، مەودای نووڕستن ئەرا هەزار مەتر کەمەو بوود.

دەسەگە ئمڕوو لە بەیاننامیگ وت: " لە سەرەتای مانگ تەمووز پلەیل گەرمی کەمیگ بەرزەو بوود و وە گشتی  شەپوول خوەڵوارینیش روی کەێد لە ناوچەگە"، وتیش، لە سوو جومعەو شەپوولیگ خوەڵوارین دەسوەپی کەێد، و لە شەوەکی شەممە کاریگەریی کەمەو بوود لە ئیوارمانەگەی دووارە دەس وە خوەڵوارین کەێد.  

دیاریکرد، تا رووژ یەکشەممە خوەڵوارینەگە وەردەوام بوود لە مەوقەی شەو کاریگەری شەپوولەگە وەرەو کەمی چوود و لە ماوەی چوار رووژ سەرەتای تەمووز لەوەر کاریگەری خوەڵوارین مەودای دوینین ئەرا هەزار مەتر کەمەو بوود.