لە ماوەی کانوون دویەم ١٥ زەویلەرزە داس لە عراق
2024-02-03T14:15:03+00:00
شەفەق نیوز/ دەسەی گشتی کەشناسی و زەویلەرزەناسی عراق، ئمڕوو شەممە، توومارکردن ١٥ زەویلەرزە لەناو عراق لە مانگ کانوون دویەم ٢٠٢٤ راگەیان.
عەبدولعەزیم عەبدولقەهار ساعدی وەڕیەوبەر دەسەگە لە بەیاننامەیگ رەسیە ئاژانس شەفەق نیوز وت: تووڕ زەویلەرزەناسی خەوەرەیل زەویلەرزە لە عراق و ناوچەیل شانی دەرکرد، کە ٣٩ زەویلەرزە لە مانگ کانوون دویەم توومار کرد، ١٥ زەویلەرزە لەناو خاک عراق بویە.
سەمیرە رزا خانمە وەڕیەوبەر بەش زەویلەرزەناسی وت: گورجی زەویلەرزەیل لە پارێزگای دهۆک بوی کە ٧ زەویلەرزە توومار کرد، و دووان لە نەینەوا و واست، و یەکیگ لە هەولێر و دیالە و سەڵاحەدین و بەسرە.
