كوشتن مەدەنییگ و مردن وزەخمداربوین سێیان تر دوو ژن ها ناویان لە باشوور عراق

شەفەق نیوز/ سەرچەوەیگ لە پۆلیس پارێزگای دیوانیە، ئمڕوو شەممە، خەوەردا لە کوشتن کەسیگ وەدەس کەسوکارەیل خوەی.

سەرچەوەگە ئەرا ئاژانس شەفەق نیوز وت: مەدەنییگ لە تەمەن ٢٨ ساڵان لەوەر گرفتەیلیگ وەگەرد ئاموزایلی وەگولە کوشیا.

وتیش؛ هێزە ئەمنیەگان لێکۆڵینەوەیگ لە رووداوەگە کردنەو و مینەی تاوانبارەیل کەن.

لە پارێزگای واسیت، ژنیگ مرد و ژن و پیاویگ تر زەخمدار بوین، لە رووداویگ لەبان ری حەی- ناسریە.

سەرچەوەیگ پزشکی ئەرا ئاژانس شەفەق نیوز وت: ژنە زەخمدارەگە زەخمەیلی سەختن و لەهووش چکه، و رانندەی ماشینەگە زەخمداریەگەی سووکە.