کەشوهەوای عراق.. ئەیلوول وە گەرمی دەسوەپی کەێد
2023-08-31T08:29:47+00:00
شەفەق نیوز/ دەسەی کەشناسی عراق، ئمڕوو پەنجشەممە، مەزەنەی کەشوهەوای وڵاتەگە لەی رووژەیل بانانە بڵاو کرد، و باس بەرزەبوین نوویگ لە پلەی گەرمی کرد.
دەسەگە لە بەیاننامەیگ رەسیە ئاژانس شەفەق نیوز وت: کەشوهەوای وڵاتەگە ئەرا سوو جمعە، لە ناوچەی ناوڕاس و باشوور خوەرە، و لە ناوچەی باکوور رووشنە وەگەرد لەکە ئەوریگ، و پلەی گەرمی لە گشت وڵاتەگە کەمیگ بەرزەو بوود.
وتیش: رووژ شەممە، لە ناوچەی ناوڕاس و باشوور رووشنە، و لە ناوچەی باکوور رووشنە وەگەرد لەکە ئەوریگ، و پلەی گەرمی لە بەشەیل ناوڕاس و باکوور نزیک رووژ وەرجە خوەیە، و لە بەش باشوور کەمیگ بەرزەو بوود.
دیاری کرد لە رووژ یەکشەممە، لە گشت ناوچەیل وڵاتەگە رووشن و خوەرە، و پلەی گەرمی لە بەشەیل ناوڕاس و باشوور نزیک رووژ وەرجە خوەیە، و لە بەش باکوور کەمیگ داوەزێد.
دەسەگە وتیش؛ کەشوهەوای وڵاتەگە لە رووژ دووشەممەی ئایندە خوەرە، و پلەی گەرمی لە بەشەیل ناوڕاس و باکوور نزیک رووژ وەرجە خوەیە، و لە بەش باشوور وڵاتەگە کەمیگ بەرزەو بوود.
