دوياى دامه‌زرانن حكومه‌ت كازمى.. هاوپه‌يمانى سه‌در مه‌رج سه‌رشمارى ديرێد
شه‌فه‌ق نيوز/ هاوپه‌يمانى سائيرون ك له‌لايه‌ن موقته‌دا سه‌در سه‌ركرده‌ى ره‌وت سه‌درييه‌و پشتگيرى ئه‌كريه‌ێد، مه‌رجه‌يليگ دانا ئه‌را ئه‌نجامداين هه‌ڵوژاردنه‌يل پيشوه‌خته له عراق.
له‌ى باوه‌ته‌و، به‌در زيادى ئه‌ندام هاوپه‌يمانيه‌گه ئه‌را شه‌فه‌ق نيوز وت: ئامانج له هه‌ڵوژاردنه‌يل پيشوه‌خته ئه‌وه‌سه هه‌ڵوژاردنه‌يل پاك و بيگه‌رد و دادگه‌رانه‌يگ بدێ، ك يه‌يش جيوه‌جێ نادێ هه‌ناى ك ئاسايش سه‌قامگير ئه‌دێ له عراق و بارودوخ ئابوورى خاسه‌و ئه‌دێ، هه‌ڵوژاردنيش هه‌وه‌جه وه دارايى فريه‌يگ ئه‌كا.
باس له‌وه‌يش كرد ئيمه ئه‌تويه‌نيم له‌ماوه‌ى شه‌ش مانگ هه‌ڵوژاردن ئه‌نجام بيه‌ێم، وه‌لێ هه‌ڵوژاردنيگ ناپاك و نادادگه‌رانه ئه‌دێ و ساخته‌كارى له‌تى ئه‌كريه‌ێد و هه‌مان روخساره‌يل دوباره‌وه ئه‌كريه‌ن، هه‌ر وه‌و خاتريشه ئه‌نجامداين هه‌ڵوژاردنيگ پيشوه‌خته هه‌وه‌جه وه سه‌رشمارى ديرێد و حكومه‌ت مسته‌فا كازمييش قه‌وڵ ئه‌نجامداين ئى سه‌رشماريه دا وه‌ى نزيكه‌يله، تا بازنه‌يل هه‌ڵوژاردن ديارى بكريه‌ن جوور ئه‌وه‌گ له ياساى هه‌ڵوژاردنه‌يل تازه هاتگه.
