دوو تویشهاتن کولێرا لە خانەقین

شەفەق نیوز/ سەرچەوەیگ پزشکی لە دیالە، ئمڕوو چوارشەممە، خەوەردا لە توومارکردن دوو تویشهاتن وە بیماری کولێرا لە قەزای خانەقین.  

سەرچەوەگە ئەرا ئاژانس شەفەق نیوز وت: ئەنجام ئەو نموونەیلە ک کلکریانە وگومان لە تویشهاتنیان وە کولێرا لەلیان کریاگە، لە تاقیگەی بەعقوبە گلەو خوارد، ودووپات لە توومارکردن دوو تویشهاتن وە کولێرا ئەرا دوو بیمار لە خەسەخانەی خانەقین کرد. 

سەرچەوەگە دیاری کرد ک دەیان لە نموونەیل هەس گومان لە تویشهاتنیان وە کولێرا لەناو تاقیگەی ناوەندی کریاگە، وچەوەڕی ئەنجامەیلی لە تاقیگەیل بەغداد پایتەخت کریەێد. 

پارێزگای سلێمانی بڵاوبوین فراوانیگ لە پەتای کولێرا وەخوەی دوینێد، و هەولێر پایتەخت هەرێم کوردستانیش چەن تویشهاتنیگ وە بیماریەگە توومار کرد.