دوو ئاگر لە زیقار و بەغداد.. دراوردن تەرمیگ لەناو کارخانەیگ سزیاگ.. وینە
شەفەق نیوز/ وەچەودیەیلیگ لە پارێزگای زیقار، ئمڕوو پەنجشەممە، خەوەردان لە هیزگردن ئاگریگ لەناو یەکیگ لە گەورەترین کۆمەڵگەی بازرگانی لە باکوور پارێزگاگە، لەوەختیگ تیمەیل وەرگری شارستانی ئاگریگ لەناو کارخانەیگ ودوکانەیلیگ بازرگانی لە ناوچەی شارع سەعدون نزیک بەنزینخانەی سەعدون ناوڕاس بەغداد کپەو کردن.
وەچەودیەیل ئەرا ئاژانس شەفەق نیوز وتن: ئاگر گەپیگ لەناو یەکیگ لە کۆمەڵگەی بازرگانی ئەرا فرووشتن وئەمارکردن چوو نزیک گەراج کۆنە لە قەزای شەترە باکوور پارێزگای زیقار هیز گرد، وتیش: زیاتر لە ٥ تیم وەرگری شارستانی کار لە کپەوکردن ئەو ئاگرە کەن.
وەچەودیەیل دیاری کردن ک زەرەدەیل ئەو ئاگرە رەسێدە دەیان مەلیۆن، وهویچ زەخمداریگ لە رویداوەگە توومار نەکریا.
هەرلیوا، تیمەیل وەرگری شارستانی لە بەغداد پایتەخت، توەنست ئاگریگ لەناو کارخانەیگ دارتاشی کپەو بکەن.
وەرگری شارستانی لە بەیاننامیگ رەسیە ئاژانس شەفەق نیوز وت: تیمەیل کار کپەوکردن وسەردەوکردن تەواو کردن، ئەوەیش هەنای وەناوچگن ئەرا ناوڕاس کارخانە سزیایەگە جیوەجی کردن، تەرم پاسەوان کارخانەگە پەیاکردن، ک وە دویکەڵ ئاگرەگە تاسیایە، وتەرمەگە دراوردن ودانەی دەس پزشک دادوەری.
