دویای ئەو بەرزەوبوین گەورا.. نرخ دۆلار لە بەغداد و کوردستان داوەزیەێد
شەفەق نیوز/ ئمڕوو سێشەممە ١٥ی کانون یەکەم ٢٠٢٠ ، دویای بەرزەوبوین نرخ دۆلار وەشیوەی گەورایگ لە بازاڕەگان بەغداد وهەرێم کوردستان، دووارە داوەزیا.
پەیامنێر ئاژانس شەفەق نیوز وت: بۆڕسەی کیفاح ناوەندی ئمڕوو، ١٢٧٨٠٠ دینار عراقی وەرانوەر ١٠٠ دۆلار ئەمریکی تۆمارکرد، و بۆڕسەی حارسیە هەمیش خود نرخەگە تۆمار کرد.
دوێەکە دووشەممە، نرخ دۆلار لە بۆڕسەی کیفاح رەسیە ١٣٢٠٠٠ دینار وەرانوەر ١٠٠ دۆلار ئەمریکی.
پەیامنێرەگەمان ئاماژەدا ک نرخ فرووشتن و سەنەین لە بازاڕە ناوخۆیەگان لە بەغداد هەمیش داوەزیا ک نرخ فرووشتن رەسیە ١٢٧٢٥٠ دینار عراقی، ونرخ سەنین رەسیە ١٢٨٢٥٠ دینار وەرانوەر ١٠٠دۆلار ئەمریکی.
لە هەولێر پایتەخت هەرێم کوردستان نرخ دۆلار هەمیش داوەزین وەخوەی دی ک نرخ فرووشتن رەسیە ١٢٧٨٠٠ دینار وەرانوەر ١٠٠ دۆلار، و سەنین بویە ١٢٧٥٠٠ دینار وەرانوەر ١٠٠ دۆلار ئەمریکی.
