دویای ٣ مانگ لە گومابوینی.. پولیس نەجەف رەسێدە بندروس کوشیان ژنیگ.. وینە
فەرماندییەگە لە بەیاننامەیگ رەسیە ئاژانس شەفەق نیوز وت: بنکەی پولیس عەباسیە، ئاگاداری ئەرای رەسیە لە ژنیگ لەبان گومابوین دویەتەگەی کە شویدارە، و تیمیگ لێکۆڵینەوە وە سەرپەرشتیاریی فەرماندەی پولیس و وەڕیەوبەر بەش دژەتاوان و ئەفسەر بەش دژەتاوان عەباسیە و شمارەیگ لە ئەفسەر دروس کریا.
بەیانامەگە دیاری کرد کە بنکەی عەباسیە توەنست تاوان نادیاریگ ئاشکرا بکەێد کە ژنیگ لە تەمەن سی ساڵان بویەسە قوربانی، و دویای ئەوە کە داڵگی داوای لێکۆڵینەوە لە بیسەروشوینیی کرد، و دویای گردەوکردن زانیاری، گومانیگ لەبان شوی قوربانیەگە پەیا بوی کە ئەندامە لە یەکیگ لە دەزگایل ئەمنی لە بەغداد، و هاوریا ئەرا نەجەف، و دەسگیر کریا.
بەیانامەگە وتیش؛ دویای لێکۆڵینەوە تا چەن ساعەتیگ وەگەردی، تاوان خوەی ئاشکرا کرد کە وە دەوانچە لە ناوچەی خۆر ئەبو نەجم کوشتیەسەی، کە ئەو شوینە نزیکەی ٢٠ کێلومەتر لە ماڵیان دویرە.
پولیس وتیش؛ توومەتبارەگە ئەرا شوین رویداوەگە بریا، و تەرم ژنە قوربانیەگە پەیا کریا، و پڕتاڵ ژن و سوخان وەگەردی بوی، چوینکە رویداوەگە سێ مانگ وەبانی رەد بویە، و تاوانبارەگە هەواڵەی دادگا کریا.
