داعش پەنا وە پەلامارەیل یەکەم نەوەی قاعیدە بەێد

داعش پەنا وە پەلامارەیل یەکەم نەوەی قاعیدە بەێد
2021-01-04T08:46:30+00:00

شەفەق نیوز/ هاووڵاتی و چەودیەرەیلیگ ئەمنی لە پارێزگای سەڵاحەدین، نووڕن ک ریخریاگ داعش وە رەفتار ریخریاگ قاعیدە پەلامارەگانی جیوەجی کەێد، تا لە ناوچەیل باشوور سەڵاحەدین خوەی نشان بیەێد و پشتگیری لە خەڵکەگە وە زوور وەربگرێد.

ئامانجەیل ئاسان

ئەبو مونیر تمیمی لە دانیشتوەیل ناحیەی یەسرب باشوور سەڵاحەدین وت: فرەی پەلامارەگان داعش لە ٣ مانگ دوایین، ماڵەیل ئەفسەرەگان یا فەرمانبەرەیل یا کەسوکارەیل وەرپرسەگان لە ئاوایە دویرەگان کەێدە ئامانج.

وتیش؛ ئەوەیش سەرتای دەرکەفتن ریخریاگ قاعیدە لە ساڵ ٢٠٠٥ خەێدە هویرمان ک هەر کەسیگ لە سوپا یا پۆلیس بوود یا وەگەرد دەزگا حکومەتیەگان هاوکار بوود کردیادە ئامانج.

تمیمی لە قسەگانی ئەرا ئاژانس شەفەق نیوز ئاماژە کرد ک داعش ئامانجەیل ئاسان و مسۆگەر پەسەن کەێد، و ویرەی پەلامارداین ئاوای و ناوچە ئارامکریایەگان نەیرێد.

تەقەلایگ ئەرا خوەینشانداین

لەلای خوەییش، رۆژنامەنووس عەبدولجبەبار مەهدی لە دانیشتوەیل سەڵاحەدین وت زیایبوین پەلامارەگان دژوە ماڵەیل ئەفسەرەگان یا فەرمانبەرە حکومەتیەگان چوودەو ئەرا ترسیان لە بەشیک لە ئاوایەگان لە هاوکارییان وەگەرد دەزگا ئەمنیەگان، و ئاماژە کرد لە ئاوایەیلیگ لە نوو لە ئاوارەیی هاتنەسەو، و لە هەڕەشەیل داعش ترسن، ک هیلێد بی دەنگ بوون و چەو لە جوولەیل داعش بپووشن.

مەهدی ئەرا ئاژانس شەفەق نیوز دووپاتکرد ک گشت پەلامارەیل داعش ئامانجەیل دویریگ کەنە ئامانج یا ماڵەیلیک لە باخەیل دویریگ لە کەرتە ئەمنیەگان ک رەسینیان ئەرا ئامانجەیلیان ئاسانەو بوود تا خوەیان نشان بیەن.

پەلامارەیل هەڕەمەکی

لەلای خوەییش، عناد یەحیا عەزاوی وەڕێۆبەر ناحیەی یەسرب وەگەرد ئەو هووکارەیل وهاندەرەیلە لە ئامانجکردن ماڵەیل ئەفسەرەگان یا کەسوکارەیلیان هاوڕا بوی.

عەزاوی ئەرا ئاژانس شەفەق نیوز وت: پەلامارەیل ئەندامەیل داعش ناوچەیلیگ دویر و چویچیای پەسەن کەن، ک خوەی رەفتار خوێڕییگە نشان ئەوە دەێد ک داعش لانەگان خوەی لە گشت ناوچەیل ناحیەی یەسرب لەدەس داگە.

عەزاوی وتیش؛ پەلامارەیل داعش لە دەورگرد یەسرب و ناوچەیل سەڵاحەدین هەڕەمەکیین، کەسیگ نێوەخشن تا هەسی نیمچە دروکانی خوەیان بچەسپنن و ئەو خەڵکە ک هەسی ریخریاگ داعش رەت کەن بخەڵەتیەن.

Shafaq Live
Shafaq Live