دەردان گوگرد بەغداد گیر تیارێد.. چەودیاریگ ژینگەیی هوشداری لە زیایبۊن قەیرانەیل هەناسەدان دەێد
شەفەق نیوز - بەغداد
چەودیار "عراق سەوز" ژینگەیی، ئمڕوو شەممە، هوشداری دا لە دووارەبۊن وەردەوام ئەرا دیاردەی بڵاوبۊن بوو گوگرد لە کەشوهەوای بەغدای پایتەخت، وە هەژمارکردنی چۊ نیشانەیگ ژینگەیی و تەندروسی رخدار کە هەڕەشە لە تەندروسی هاووڵاتییەیل و بیوەییان کەێد.
چەودیارەگە لە راپۆرتیگ دیاری کرد، کە ئەو دەرچگنەیلە لە ئەنجام سزانن سزەمەنی سەنگین فرەگوگردن لە وێستگەیل بەرهەمهاوردن و پاڵاوگەیل، لەشان سزانن جیماگەیل پلاستیکی و زواڵنە هەڕەمەکییەیل لە دەورگرد بەغداد.
وتیش کە بڵاوبۊن ئیجۊر بوویگ لە کەمتر لە دوو هەفتە دووپات نەوین هیچ چارەسەرییەیل ئەرا ئی کارە کەێد چۊ ئەوەگ لایەنە فەرمییەیلە ئۊشن، و دیاری کرد کە زیایبۊنیگ هەس لە هەوکردن لویلەیل هەناسە و قەیرانەیل هەناسەدان، وە تایبەت ناوەین زاڕووەیل و گەورەتەمەنەیل و تویشهاتگەیل تەنگەنەفەسی، و نشان ئەوەیش دا کە دیاردەی ئاڵشتبوین پلەی گەرمی هاوبەش بۊە لە گردن ئی گازە ژاراوییەیلە لە نزیک رۊ زەوی لە سەعاتەیل شەو و شەوەکی زۊ.
چەودیارەگە داواکاری خوەی ئەرا لایەنە حکومییەیل و وەزارەتە پەیوەندیدارەیل دووارەو کرد وە وسانن دەسوەجێ لە وەکارهاوردن سزەمەنی لە دامەزراوە نزیکەیل لە ناوچەیل دانیشتگی، و چەسپانن چەودیارییگ تون و بەسین شوینەیل سزانن هەڕەمەکی ئەرا گەناڵخە، و کارپیکردن ئامێرەیل چەودیاری ژینگەیی و راگەیانن ئاستەیل پیسبۊن ئەرا جەماوەر وە ئاشکرا.
