خانمە جیگر وەزیر دەرەوەی ئیتاڵیا رەسێدە دیدار نێچیروان بارزانی
شەفەق نیوز/ خانمە جیگر وەزیر دەرەوەی ئیتاڵیا ک هاتیەسە سەردان هەرێم کوردستان، ئمڕوو شەممە، راگەیان ک عراق و کوردستان لە نوای گرنگیەیل وڵاتەگەی تیەن، و دووارە مکیس سەرۆک هەرێم کوردستان ئەرا سەردان رۆما کرد، و نێچیروان بارزانی باس سوپاس هەرێم کوردستان ئەرا هاوکاریەێل مرۆیی و سەربازی ئیتاڵیا ئەرا عراق و هەرێم کوردستان لە جەنگەگەی دژوە داعش کرد.
سەرۆکایەتی هەرێم کوردستان لە بەیاننامیگ رەسیە ئاژانس شەفەق نیوز وت: نێچیروان بارزانی سەرۆک هەرێم کوردستان، دویای نیمەڕو ئمڕوو، پیشوازی لە مارینا سیرینی خانمە جیگر وەزیر دەرەوەی ئیتاڵیا وەگەرد شاند یاوەری کرد، ولە دیدارەگە باس پەیوەندیەیل ئیتاڵیا وەرد عراق و هەرێم کوردستان، دویاترین گەشەیل رەوش سیاسی لە عراق، پەیوەندیەیل هەولێر-بەغداد، رەوشەیل ناوخۆیی هەرێم کوردستان، مەترسیەیل تیرۆر وجویلەیل داعش کریا.
بەیاننامەگە وتیش: وەگەرد نشاندان ئارەزوو هەرێم کوردستان وە بتەوکردن پەیوەندیەیلی وەرد ئیتاڵیا، و فراوانکردن هاوکاری ناوبەینیان، نێچیروان بارزانی سوپاس هەرێم کوردستان ئەرا هاوکاریەیل مرۆیی و سەربازی ئیتاڵیا ئەرا عراق و هەرێم کوردستان لە جەنگەگەی دژوە داعش نووەو کرد.
وەگورەی بەیاننامەگە، هەردوگ لایەنەگە لەڕایان لەبان گرنگی ئارامی ئەمنی وسیاسی وئابووری لە عراق ڕێک کەفتن، وهەمیش گرنگی گفتوگۆکردن ورەسین لایەنەیل عراق ئەرا لەیەکڕەسینەوەیگ ک کار سیاسی وڵاتەگە لە بەسیان ووسیان دەرکەێد، و بڕەسێدە پەیابوین حکومەتیگ گشتگیر ک دوایل گەل پیکاتەیل عراق جیوەجی بکەێد.
بەیاننامەی سەرۆکایەتی هەرێم کوردستان وتیش" سیرینی دووارەی مکیسکردن نێچیروان بارزانی لەلایەن وەزیر دەرەوەی ئیتاڵیا ئەرا سەردان رۆما کرد، ودووپات کرد ک خوەرهەڵات ناوڕاس وعراق و هەرێم کوردستان لە نوای گرنگیەیل ئیتاڵیا وبەڕنامەیل ئەوزەڵکردن وهاوکاری تیەن، و وڵاتەگەی وە گرنگی نووڕێدە عراق و هەرێم کوردستان.
بەیاننامەگە دیاری کرد ک لەو گردەوبوینە ک هەرلە باڵیۆز ئیتاڵیا لە بەغداد و قونسڵی لە هەولێر ئامادەی بوین، باس ئامادەبوین ئیتاڵیا وچالاکیەیلی لە چین روشنهۊری و ئاسەواری لە عراق و هەرێم کوردستان، و رەوشەیل سوریا وبڕیگ باوەت خاوەن گرنگی لەلای هەردوگ لایەنەگە کریا.
