تەندروسی عراق ئامار تەو خوینوەربوین لە وڵاتەگە ئاشکرا کەێد
شەفەق نیوز/ وەزارەت تەندروسی عراق، ئمڕوو پەنجشەممە، راگەیان زیقار کەفتە نوای پارێزگایل وڵاتەگە لە شمارەی مردن و تویشهاتنەیل ڤایرۆس تەو خوینوەربوین.
سەیف بەدر قسەکەر وەزارەتەگە لە وتاریگ دەنگی رەسیە ئاژانس شەفەق نیوز وت: هەڵویست ئیرنگەی تویشهاتنەیل تەو خوینوەربوین لە عراق لە سەرتای ئی ساڵە تا ئیسە رەسیە ٢٧٣ تویشهاتن و ٤٩ مردن لە پارێزگایل عراق.
بەدر باس تویشهاتن و مردنەیل لەهەر پارێزگایگ کرد وەیجویرە:
زیقار: یەک ١١٣ تویشهاتن، ٢٦ مردن، میسان" ٣١ تویشهاتن، ٣ مردن، واست: ٢٤ تویشهاتن، یەک مردن، بابل: ٢٤ تویشهاتن، ٢ مردن، موسەنا: ١٧ تویشهاتن، ٦ مردن، بەسرە: ١١ تویشهاتن، یەک مردن، دیوانیە: ١ تویشهاتن، وەبی مردن، بەغداد/ کەرخ: ٩ تویشهاتن، ٢ مردن، بەغداد/ رەسافە: ٦ تویشهاتن، ٢ مردن، کەربەلا: ٨ تویشهاتن، وەبی مردن، نەینەوا: ٤ تویشهاتن، وەبی مردن، هەولێر: ٣ تویشهاتن، یەک مردن، کەرکوک: ٣ تویشهاتن، یەک مردن، نەجەف: ٣ تویشهاتن، وەبی مردن، دیالە: ٢ تویشهاتن، یەک مردن، سەڵاحەدین: ٢ تویشهاتن، یەک مردن، دهۆک: ٢ تویشهاتن، وەبی مردن، ئەنبار: یەک تویشهاتن، وەبی مردن.
بەدر وتیش: تاوانی مقەیەتیکردن لەی بیماریە هەس وە جیوەجیکردن ریکارەیل ئاسانیگ، گەنگتریان لەوەرکردن دڵنگ گونجیاگ ودەسکیش تایبەت ئەرا ئیوەتکەرەیل ئاژەڵ وقەساوەیل، وتەمەی وەکارهاوردن چەقوییگ تایبەت ئەرا بڕین گووشت کەیمن و وریایی لە نشانەیل بیماریەگە ک وەتەو دەسوەپی کەێد وژان لە چەن شوینیگ لە لەش، ویە یەکەم ئاستە لە بیماریەگە ک توانای چارەکردنی هەس، دیاری کرد؛ بڵگەی ئەوەسە ک نیمەی ئەو تویشهاتنەیلە وە تەواوی خاسەوبوینە، وەلێ ئەگەر بیماریەگە رەسیە ئاست دویەم فرە رخبەرە، ک خوین لە لەش و لەژیر پووس وەربوود، وئەگەر مردنی فرە بەرزە.
بەدر دووپات لە ئامادەبوین گشت دامەزراوەیل تەندروسی لە وەزارەت تەندروسی کرد ئەرا رەفتاکردن وەگەرد ئی بیماریە، لە خود وەختەگە وتیش: تا ئیسە دەرمان وچارەیگ یا واکسینیگ ڤایرۆسی ڕاستەخۆ نییە، وەلێ ئاشکراکردن بیماریەگە لە وەخت زوییگ و پیشکەشکردن چەودیری پزشکی ونواگردن زیایبوین ئەگەر خاسەوبوین بەرزیگ خەێدە وەردەس، باوجی ئەگەر دیر کەفت، ئەگەر مردن بەرزەو بوود.
