باڵیۆز تورکیا وڵاتەگەی بیتاوان کەێد و گوناه هشکەساڵی خەێدە بان عراق

باڵیۆز تورکیا وڵاتەگەی بیتاوان کەێد و گوناه هشکەساڵی خەێدە بان عراق
2022-07-12T12:12:02+00:00

شەفەق نیوز/ باڵیۆز تورکیا لە بەغداد، عەلی رزا گونای، ئمڕوو سێشەممە، وەرپرسایەتی ئەو هشکەساڵیە ک وڵاتەگە زیان لەلی دوینێد، خستە بان عراق لەوەر وڵکردن ئاوەگە و وەکارنەهاوردنی وەشیوەیگ خاس، وئەوە وەدرو نشان دا ک وڵاتەگەی ئاوەگە بڕیە وروی چەمەیل ئاڵشت کردیە.

گونای لە پۆستیگ لەبان تویتەر  نویسان و ئاژانس شەفەق نیوز نووڕیەی وت: ئاوەگە وەشیوەی گەورەیگ لە عراق وڵ کریەێد، وبایەتە کارەیلیگ کوتپڕ جیوەجی بکریەێد تا نوای ئی وڵکردنە بگرێد، وچارەی گرفت هشکەساڵی بکەێد، نەگ وە داوای ئاو زیاتر باوجی وە وەکارهاوردن گونجیاگ، و ئیمە ئامادەیمن ئەرا دەسمیەتی.  

وتیش: بایەتە بەرهەمهاوردن لە بینا ژیرینە بکریەێد و کۆمپانیایل تورکیا ئەرا ئەوە ئامادەن، وتورکیا ئاوەگە وەگورەی خوازینی لە کشتوکاڵی و وزە وەکار تیارێد.     

وتیش: هشکەساڵی تەنیا گیچەڵ عراق نییە، باوجی گرفت تورکیا وگشت ناوچەگەس، لەوەر گیرهاتن گەرمی، وئەوەسا لە ساڵەیل ئایندە هشکەساڵی زیاتر تیەێد. 

گونای وتیش: خاسترین شیوەی ئەرا نواگردن ئی گیچەڵە وداوای ئاو زیاتر لە تورکیا نییە، باوجی وەکارهاوردن ئەو ئاوە ک هەس وە خاسترین شیوە لە کەمکردن وەکارهاوردن ئاو. 

ولەبان گرنگی ئەوە دووپات کرد ک بایەتە سیستەیل ئاویاری نووەو بکەیرێد و واز لە ئاویاری جارانی بارێد ک هیلێد ئاوەگە وڵ بوود. 

گونای وتیش: تورکیا ئەو دەوڵەت دەوڵەمەنە نییە لەئاو، وەگەرد ئەوەیش، وەقسەی سەرۆک کۆمارمان: ئاو نیعمەتیگە لە خودا وبیبەش برا عراقیەیلمان لەی نیعمەتە نیەکەیمن. 

باڵیۆز تورکیا لە کۆتایی وت: گرنگە ک عراق ئەرک خوەی وەشیوەی گونجیاگ جیوەجی بکەێد.

Shafaq Live
Shafaq Live