بەغداد وەتەواوی وە خاک پووشیەێد و خەسەخانەیلی کەفنە ئامادەباشی
شەفەق نیوز/ خاک ئاسمان بەغداد پایتەخت وە شیوەی تەواویگ لە دویەشەوەو پووشێە، ئەوەیش دویای ئەوەگ گەردەلویلیگ خوەڵوتوز لە سنوور خوەرئاوا لە بیاوان پارێزگای ئەنبار هەڵکەفت، لە وەختیگ خەسەخانەیل پایتەخت کەفتنە ئامادەباشی ئەرا وەرگردن سەدان تویشهاتن تاسیان.
رامی شاکر سەرۆک پزشکەیل خەسەخانەی یەرموک لە بەغداد لە بەیاننامی راگەیانن خەسەخانەگە وت: بەش فریاکەفتن ٦٠٠ راسیان لە ساعەتەیل گوزەشتە وەرگرد، لەوەر ئەو گەردەلۊل خوەڵوتوزە ک بەغداد گردە وەر، و دیاری کرد ک نزیکەی ٨٥ لەسەد لەلیان لە خەسەخانە دەرچگن وەبی تووماکردن هویچ مردنیگ.
وتیش: کادرەیل خەسەخانەگە ئامادەباشی راگەیانن ئەرا وەرگردن تویشهاتنەیل تاسیان وە خوەڵوتوزەگە، ک توەنستن چارەیان بکەن تا ئەرا ماڵەیلیان بچن.
وەڕیەوبەر پۆلیس فریاکەفتن بەغداد عەمید سەباح روبەیعی فەرمان گەردین لە گشت ناوچەیل بەغداد، و جیوەجیکردن ریکارەیلیگ مقەیەتیکردن و دەسوەردان کوتپڕ ئەرا رەسانن هەر تویشهاتنیگ تاسیان ئەرا خەسەخانەیل بەغداد، ئەوەیش وەگەرد سەختەوبوین خوەڵوتوزەگە ک دەێد لە چەن شارەیگ لە وڵاتەگە.
روبەیعی وتیش: دەوریەکان دەسکردنە بڵاوبوین و هوشیاری و گەردین وەردەوام لە کویچە و گەڕەکەیل تا خراوی کەشوهەواگە لەلایەن بەدکارەیل نەکریەدە دەرفەتیگ ئەرا دزیکردن یا دەگەی هووزانە یا تەقەکردن.
