بەرهەم ساڵح: هاتێ بەسیان سیاسی وڵاتەگە وەرەو تەڵەسم رخبەریگ بوەێد
شەفەق نیوز/ بەرهەم ساڵح سەرۆک کۆمار، ئمڕوو سێشەممە، وت: بەسیان سیاسی و دروسنەکردن حکومەت دویای پەنج مانگ لە هەڵبژاردن کاریگ نیگەرانی و پەسەن نەکریاگە، و هەمیش هوشداری لە سڕبردن وڵاتەگە کرد وەرەو تەڵەسمەیل رخبەریگ ئەگەر کارەگە وەیجویرە وەڕیەو بچوود، و دووپات کرد ک هەڵبژاردن وەرجەوەخت ریگرەیلیگ کەفتنە رویی ک نەبایەت وەپشتگووش بخریەن.
ساڵح لە وتاریگ لەناو ئاهەنگ ٤١ساڵیاد دامەزرانن ریخریاگ بەدر لە بەغداد ک ئاژانس شەفەق نیوز چەودێریی کرد وت: ئی بەسیان سیاسی ئیسە لە ئەنجامداین شایستەیل دەستووری و دروسکردن حکومەت نوو دویای پەنج مانگ لە هەڵبژاردن بویە کاریگ نیگەرانی و ناپەسەن، و ئەرگەر وەردەوام بوود وڵاتەگە وەرەو تەڵەسمەیل رخبەریگ سڕنێد.
ساڵح وتیش: هەسە ک خوازێد عراقیەیلە پپلگیەنە ناو ململانەی ناوخوەیی هازیان و هەسییان لەناو بەێد، و نەبایەت عراقیەیل رازی وەوە بوون، ک عراق سەروەخوەی خاوەن سەروەری و بەرژەوەنی عراقیەگانە و بنەمای پڕۆژەی نیشتمانیانە.
سەرۆک کۆمار لە وتارەگەی وت: ئەو هەڵبژاردن وەرجەوەختە ک گەل و هیزەیل نیشتمانی ئەرا چارەیگ تواستنەی ک ئارامی سیاسی و کۆمەڵایەتی جیوەجی بکەێد، کەفتە وەر ریگرەیلیگ ک نەبایەت وەپشتگووش بخریەن، و دیاری کرد توانای پشتسەرنان ئی ریگرەیلە وە یەکێتی ووشە و پەسەنکردن بەرژەوەنی نیشتمانی باڵا هەس لەی ئاڵشبویەیل ئاڵووز هەرێمی و ناودەوڵەتیە.
و دیاری کرد ک مقەیەتیکردن وڵاتەگە وسیانیگ راسی خوازێد ئەرا چارەی ئەو هەڵەیل کەڵکەبویە وەکردەوی رەوشەیلیگ هیشتن سیستەم دەسەڵاتداری زەنگ بخوەێد، و دان وە گرنگی چاکسازی و چارەی شوینەل گیچەڵەگە خوازێد وە گریەبس سیاسی نوویگ ک بیلێد عراقیەگان بینایگ راسی ئەرا دەوڵەتیگ خاوەن سەروەری تەواو بسازێد.
