دو چالاک کورد فەیلی رەد کریان
شەفەق نیوز- دو چالاک سیاسی مەدەنی کورد فەیلی ک ئەڕا ئنتخابات شەورای ئسڵامی شار تێهران ئوو پارڵمان ئێران نام‌نووسی کردبین، رەد سەڵاحییەت کریان.
وەوجوورە ک دیارە؛ مستەفا بەیگی ناسریاگ وە "رودوس فەیلی" ک ئەڕا شەورا و مەجڵس تێهران وە یەکا نام نووسانگە وەگەرد دوکتور مەهین عەباسی ک هە ئەڕا شەورای شار تێهران نام نووسانگە رەد کریانە.
وەوجوورە ک ئاگادارەێلە وتنە؛ ئی دو چالاکوان سیاسیە لە لایەن جەرخەێ حاکمییەتی هەیئەت نزارەت شەوراێ نگەهبان قانوون ئەساسی جومهووری ئسڵامی ئێران ک ئی دو چالاکوانە، پاوەنە وە قانوون ئەساسی ئوو وە وڵایەت موتڵەقەێ فەقی نه‌زانستگە، رەد سەڵاحییەت کریانە.
وە خاتر دو بەند قانوونی "عەدەم ئڵتزام وە وڵایەت موتڵەقەێ فەقی، ئوو عەدەم ئبراز وەفاداری وە قانوون ئەساسی" نواێ بەشداری ئی دوانە جوور کاندیداێل ئنتخابات ئی دەورە گیریاگە.
رودوس فەیلی "مستەفا بەیگی" ئەندام شەورای ناوەندی جامێعەی کوردەکانی مەرکەز "کۆڕی کوردانی تاران" ئوو بەرپرس جامێعەی ئیلامیان مەرکەز "تێهران"ە ک وە کورتەنام "ج ا م" دناسرێ.
مەهین عەباسی هەم بەرپرس لق ژنان جامێعەی ئیلامیان مەرکەز ئوو ئەندام کوڕ کورد تێهرانە.
ئی دو چالاکە هەردوگێیان لەو بیس و دو چالاکەێل کوردەنە ک وەیەکا داخواز بنەڕا ناین یەکم حزب کوردی دە ئێران وە نام "داهاتووی گەش" کردنە و هێمان جەواز ئی حزبە نەدریاگەسە.
ئەوان دە دەورەێل وەر ژە یەیش هەمجا چەن جارێ تر ئەڕا ئنتخابات تێهران و ئیلام، رەد سەڵاحییەت کریانە و هەر دوگێیان یە چەن جارە ک دە تێهران یەکاگرتنەێلێ هووزایەتی وە نام "ئێتڵاف کورد تێهران" و "ئێتڵاف زاگڕوسییەێل تێهران" دامەزراننە تا کاندیداێل کورد دە تێهران، دە جەرخەێلێگ کوردانە دەور یەکا گردەو بکرن.
رودوس فەیلی ک دە ئنتخابات دەوەرەێل پێش، وە پرتاڵ کوردی چگە وزارەت کشوەر و نام نووسان ئەڕا کاندیداتووری مەجڵس تێهران، خەوەرسازەو بی و رووژنامەێلە و هەواڵنێیارییەێلە وە نام "یەکم کوردی‌پووش ئنتخابات تێهران" نامگیرێ کردن.
وەوجوورە ک دویشن؛ وە بان یە ک نزیکەێ پانزە لە سەد شاروەندەێل تێهرانی کوردزوانن باوجی تا ئێسە ئی کەمهووزە دە تێهران، نەتوانستنە وەوجوورە ک بەشێیانە دە شەوراێ شار ئوو مەجڵس تێهران، نوێنەرەێلێ ک هەست کوردایەتی بداشتووبێ ئوو شوونگری داخوازەێل هووزایەتی ئەوان بکەن، بداشتووبن.
