ئامار دوو پەلامارەگەی دیالە رەسیە هەفت قوربانی و زەخمدارەیلیگ

 شەفەق نیوز/ سەرچەوەیگ ئەمنی، ئمڕوو جمعە، خەوەردا لە بەرزەوبوین ئامار تەقینەوەی دوو پەلامارەگە لەبان پۆلیس لە پارێزگای دیالە ئەرا سێ قوربانی و چوار زەخمداربوین.

سەرچەوەگە ئەرا ئاژانس شەفەق نیوز وت: بومبیگ دانریاگ تەقیە بان ماشینیگ مەدەنی لە ئاوای جێزانی سەروە ناحیەی عەبارە، و هەنای دەوریەیگ پۆلیس روی وەرەو شوین رووداوەگە کرد بومبیگ تر تەقیە بان دەوریەگە، و لە مەوقەی تەقینەوەگە ئەندامەیلیگ لە داعش پەلامار پۆلیسەکان و ئەو کەسەیلەگ لەورا بوین وە چەک قەناسی دان، ک بویە هووکار کەشتنە٣ ئەندام پۆلیس یەک ئەفسەر لەناویان بوی، و زەخمداربوین چوار لە مەدەنی و پۆلیس.

وتیش؛ هێزەیلیگ لە پۆلیس رەسینە شوین رووداوەگە و قوربانی و زەخمدارەیل هەڵگردن و دەسکردنە هەڵمەتیگ وەشکین و مینەکردن جیوەجیکەرەیل پەلامارەگە لەناو رەوشەیل شیواشیویگ لەناو ئاوایەگە.