ئازادکردن داڵگ و سێ مناڵی و دەسگریکردن رفنەرەیل

شەفەق نیوز/ پۆلیس فیدراڵی، رووژ چوارشەممە، راگەیان  ئازادکردن و داڵگیگ و سێ مناڵە رفیای، و دەسگیرکردن بڕفنەرەیلیان لە ناوچەی ئەمین لە خوەرهەڵات بەغدای پایتەخت. 

پۆلیس لە بەیاننامیگ رەسیە ئاژانس شەفەق نیوز باسکرد، " هێزەیل لە لیوای دۊیەم تیم یەکەم پۆلیس فیدراڵی وە هاوکاری وەگەرد مەفرەزەیل هەواڵگیری فەوج سێیەم سەر وە ئاژانس هەواڵگیری و لێکۆڵینەوەی فیدراڵی سێ تاوانبار دەسگیر کردنە ک داڵگیگ و سێ مناڵی رفاننە (دو دۊت و کوریگ)".  

وتیش،" ئەرک دەسگیرکردنەگە دەسکریا وەپی  لە دۊای رەسین زانیارییەیل لەباوەت  پسای رفانن دەسکریا وە ئاخڵەداین ناوچەگە و دانان بازگەیل و کوڵە و چەودێری جۊلەیل رفێنەرەیل، تا تۊنستن دەسگیریان بکەن لەماوەی پیمانەیی کەمیگ، و رادەس لایەنەیل تایبەت کریان ئەرا تەواوکردن رێکارەیل لێکۆلینەوەی و یاسایی وەگەردیان.