پارێزگایگ عراقی راگەینێد سەرکەفتن گەورایگ لەبان کۆڤید-١٩
شەفەق نیوز/ فەرمانگەی تەندروسی دیالە، ئمڕوو شەممە، راگەیان داوەزین رێژەی تووشهاتنەگان وە ڤایڕۆس کۆڕۆنا لە پارێزگاگە ئەرا کەمتر لە ٥ لەسەد، وەگەرد بەرزەوبوین رێژەی خاسەوبوینەگان ئەرا ٩٦ لەسەد.
نەبیل فازڵ حوزام وەڕێۆبەر تەندروسی گشتی لە فەرمانگەگە ئەرا ئاژانس شەفەق نیوز وت: ژمارەی تووشهاتگەگان ک لە ناوەندەیل کەرەنتین تەندروسی خەفتنە لە رووژانە هانە ناونی ٣٠ تا ٥٠ تووشهاتگ لە بڕ ٥٧٠ شەوخەف تایبەتکریاگ ئەرا بیمارەیل کۆڕۆنا و دابەش کریانەسە گشت ناوەندەیل کەرەنتین تەندروسی لە پارێزگاگە.
حوزام وتیش؛ رێژەیل تووشهاتنەگان کۆڕۆنا داوەزین گەورایگ لە ٣٠ تا ٥ لەسەد لە گشت ناوچەیل دیالە تۆمار کردن، و دووپاتکرد ک ریکارە مقەیەتیەگان فەرمانگەی تەندروسی دیالە لە داوەزین رێژەیل تووشهاتنەگان و بەرزەوکردن رێژەیل خاسەوبویەگان ئەرا ٩٦ لە سەد سەرکەفتن.
وەڕێۆبەر تەندروسی دیالە دڵنیا وە کەمەوبوین مەترسی کۆڕۆنا لە پارێزگاگە وەشیوەی گەورایگ کرد، و ئاماژە کرد ک وەرەو خاسی چوود.
دیالە لە وەخت بڵاوبوین پەتاگە لە ئادار گوزەیشتەو ٢١١٨٩ تووشهاتن وە کۆڕۆنا تۆمار کردگە، وەرانەوەر ٢٠٣٤٠ خاسەوبوین و ٣٧١ مردن.
