20 هەزار کەس لە دەروازەی سنووری شەلامچە لە ناوەین عراق و ئیران رەد بوون
شەفەق نیوز - تاران
جيگر پارێزگار خوزستان ئەرا کاروبار ئاسایش و جیوەجیکردن یاسا، وەلیولڵا حەیاتی، راگەیان کە دەروازەی سنووری شەلامچە وەرد عراق رووژانە پيشوازی لە زیاتر لە 20 هەزار کەس کەێد و رەدیان کەێد.
حەیاتی، لە لێدوانیگ کە ئاژانس "ئیرنا" خستیەسەی رۊ، وت کە پلانیگ هەس ئەرا گواستنەوەی ریکارەیل گومرک لە دەروازەی سنووری شەلامچە وەرەو گەراج گەورەی ئەربەعین ئەرا رێکخستن جۊلەی بارهەڵگرەیل و ئاسانکردن پرۆسەیل هەناردەکردن.
وتیش: "وەپەی پلان و رێنماییەیل پارێزگار خوزستان، ئی گەراجە ئەرا کەرت بازرگانی لە هەفتەی ئایەندەو لە وەردەس بوود، و ریکارەیل گومرک لەناوی جیوەجی کریەێد".
دووپات کرد کە "لە بەش گەشتیارەیل، دەروازەیل پاسپۆرت وە شیوەیگ ئاسایی کار کەن، و جۊلەی گەشتیارەیل وە ئاسانی وەڕیەو چۊد".
دیاری کرد کە دەروازەگە لە وەخت ئیسە لە دریژایی شەوڕووژ کار کەێد لە هەردوگ کەرت گەشتیارەیل و بازرگانی، و جۊلەی گەشتیارەیل و پرۆسەیل هەناردەکردن وەردەوامە.
جی باسە کە سنوورە ناودەوڵەتییەیل شەلامچە کەفێدە دۊری 20 کیلۆمەتر لە شار خورەمشەهر لە پارێزگای خوزستان و 15 کیلۆمەتر لە شار بەسرەی عراقی.
ئی سنوورەیلە وە خاوەن گرنگییگ ئابووری فرە ئەرا پارێزگای خوزستان هەژمار کریەین، و تۊنن وە شیوەیگ کارا دەسمیەتی بیەن لە فراوانکردن هەناردەیل، و زیایکردن ئاڵوگۆڕ بازرگانی، و هازدارکردن پەیوەندییە ئابوورییەیل وەرد بازاڕە ئامانجدارەیل.
