هیمان چارەنویس ژیردەریاییە گومابویەگە دیار نییە
2023-06-22T07:15:36+00:00
شەفەق نیوز/ پاسەوان کناراوەیل ئەمریکا، وتن: مینەکردن ژیردەریایی «تیتان» ک لە ژیر زەریای ئەتڵەسی گوما بویە نەڕەسیەسە هویچ ئەنجامیگ، وتیش؛ هیمان دیار نییە ئەو دەنگەیلە ک لە قویلاییەو رەسینە سۆنارەگە هن چە بویە.
وتیش؛ ئەوەسا لە مینەکردن ژیردەریاییە گومابویەگە وەردەوام بویمن، و ٥ تیم رزگارکردن کەفتنەسە مینەی، و ئەوەسا ١٠ تیمیش وەگەردیان زیای بوون.
وتیش؛ وەڕاسی نەیزانیمن ئەو ژاوەژاوە ک تیەێدە ناو سۆنارەگە هن چەس، و لە سەرچەوەی ئەو ژاوەژاوە مینە کەیمن.
شەو یەکشەممە، ئاگاداری لە دیارنەمان ژیردەریایی تیتان دریا وە دویری ٧٠٠ کێلومەتر وەرەو باشوور سانت جۆنز بە ناوچەی نیوفاوندلاند کەنەدا.
ئەو ژیردەریاییە ئەرا وینەگردن جیماگەیل کەشتی تایتانیک چگە قویلایی زەریا و ٥ کەس لەناوی بوین، یەکیگیان ملیاردێر بەریتانی هامیش هاردینگ، و سەرۆک کۆمپانیای (ئۆشن گیت) و وەشکینکاریگ فەرەنسی، و خاوەن بزنسیگ وەگەرد کوڕەگەی.
