مردن ٢٨ کەس لە هندستان دویای نووشین مەی دەسکرد
2022-07-26T12:02:48+00:00
شەفەق نیوز/ وەرپرسەیلیگ لە وڵات هند، ئمڕوو سێشەممە، خەوەردان لە مردن ٢٨ لەلای کەمەو، و بیماری ٦٠ کەس، دویای نووشین مەییگ ک بەد دروسکریایە، ئەوەیش لە خوەرئاوای وڵاتەگە.
موکیش بارمار وەرپرس حکومەتی ناودیار وت: ئەو کەسەیلە لە ناوچەیل ئەحمەد ئاباد وبوتاد لە ویلایەت گوجارات مردنە، ک ئەو ناوچەیلە فرووشتن ودروسکردن مەی لەناویان قەیەغەس، وهیمان دیار نییە کام مادەی کیمایی لە دروسکردن ئی مەیە وەکار هاوریایە.
ئاژانس خەوەری "رێس ترەست ئۆف ئینديا" وت: پۆلیس بڕیگ لە قاچاغچیەیل دەسگیر کرد ک گومان لە فرووشتن مەی لەلیان کریەێد، ک مردن وە نووشین مەی بەد لە وڵات هند چشت باویگە، ک نرخیان ئەرزانە وفرەجاریش تیکڵای ژەهر مەلەوەر کریەێد، تا خاستر سەرخوەش بکەێد.
