یەمەن.. شمارەی قوربانیەیل پەلامارەیل لەی دویاییەی ئیسرائیل ئاشکرا کریا

شەفەق نیوز/ وەزارەت تەندروسی سەر وە حوسیەیل، ئمڕوو سێشەممە، ئاشکرایکرد 4 کەس کوشیایە و 39 کەسیش زەخمدارە لە ئەنجام گورزە ئاسمانیەیل  لەی دویاییەی ئیسرائیل وەبان وڵاتەگە.

وەزارەت تەندروسی سەنعا لە بەیاننامەیگ ئاژانس شەفەق نیوز دیەسێ راگەیان، "لە ئەنجام گورزەیل 3 هاوڵاتی کوشیا و 35 ترەک زەخمداربوین، لە ئەنجام وە ئامانج گردن کارگەی چیمەنتوو لە ناوچەی باجل سەر وە پارێزگای حەدیدە".

وتیش، "کەسیگ ترەکیش کوشیاگەو 4 کەسیش زەخمداربوین لەو گورزەیلە کە بەندەر سەرەکی هەمان پارێزگا گردیەسە ئامانج".

ئیسرائیل پەلاماردان سەختیگ وەبان پارێزگای حەدیدە دەسوەپیکردیە، ئەرا جواوداین گورزە موشەکیەیل حوسیەیل لە نزیک فرۆکەخانەی بن غوریون لە تل ئەبیب.

لە گوزەشتە حوسیەیل وەرپرسیارەتی خوەی لە تەقانن موشەکیگ بالستی وە ئاراستەی  ئیسرائیل راگەیان، دووپاتکرد ئۆپراسیۆنەگە "جواوداینە ئەرا فراوانبوین دوژمنەیل لە غەزە".