لافاوەیل پاکستان.. کوشیان 220 کەس لە ئامار نوویگ
شەفەق نيوز- ئیسلام ئاباد
میدیایەیل راگەیانن، ئمڕوو شەممە، خەوەردان لە بەرزەوبوین ئامار قوربانیەیل لافاوەیل و رمیان زەوی لە باکوور خوەرئاوای پاکستان، ئەرا 220 کەس لەلای کەمەوڕ دویای دراوردن تەرم 63 کەس وەخت شەو لە ماڵەیلیگ نقوم لە ئاو وارانەیل بوین.
محمد سهێل قسەکەر فریاکەفتن وت: سەدان لە کارمەنەیل رزگارکردن هیمان مینەی کەسەیلیگ کەن لە ناوچەی بونەر کویەیی لە هەرێم خەیبەر بەختونخوا، مە وارانە رفتەیل و زریانەیل لافاوەیل سەختیگ دویەکە جمعە دروس کردن، دەیان لە ماڵەیل ماڵیە.
جیگر وەرپرس ناوچەی بونەر، کاشف قەیوم وت: تیمەیل رزگارکردن هانە ئاوایەیل پیر بابا و مالیک بورا کە فرەتەر زەرەدمەن بوینە، کە دویەکە جمعە فرەی دانیشتگەیلی مردن.
ئیمتیاز خان ئەفسەر پولیس ناوچەگە کە لە رمیانەیل رزگاری بوی وت: ئاو لافاوەیل سەدان لە سانە سەنگینەیل وەرد خوەیا هاورد، و دەیان ماڵ وە وەخت کەمیگ ماڵیە، و ناوەند سەرەکی پولیسیش خاپوور کرد.
وتیش: ئەگەر نەڕەسیامنە زەوی بەرزیگ وەنە قورتار نەویمن.
رزگاربویەیل وتن: لافاوەگە هەر ئاو پەتی نەویە، وەلێ تیکەڵایگ لە خەڕگ و سان کەپ بوی.
محمد تاریق پزشک لە خەستەخانەس حکومەت بونەر وت: فرەی قوربانیەیل وەرجە رەسین ئەرا خەسەخانە گیانیان لەدەسدان، و مناڵ و پیاوەیل فرەیگ لەناویان بوی، و ژنەیل لەبان تەپەیل بوین چیلگ گردەو کردیان و شوانی کردیان.
وەدویری نزیکەی 300 کیلۆمەتر لەو بەشە کە کەفتیەسە دەس هندستان لە کەشمیر، لافاویگ ناکاوی داد لە ئاوای تشوسيتی لە ناوچەی كيشتوار، کە بویە مدوو کوشیان 60 شخصاً و زەخمداری نزیکەی 150 کەس ترەک، و دەسەڵاتەیل نزیکەی 300 رزگار کردن، و نزیکەی 4000 حاجی وەرەو شوینەیلیگ ئارام بردن لە وەرز حەجکردن ساڵانەی هندۆسی.
پسپۆڕەیل وتن: ئی وارانەیل رفتە بە ناوچەیل کویەیل هیماڵایای هندی و ناوچەیل باکوور پاکستان پەیوەندی وە بەشیگ لە ئاڵشتبوین کەشوهەوا دیرێد.
