کشاوەرزی سوریا ئەرا شەفەق نیوز: ١٥ هەزار هێکتار لەوەر هیزگردن ئاگر لازقیە زەرەد وەپیان رەسیە

شەفەق نیوز ــ دیمەشق

وەزارەت کشاوەرزی سوریا، ئمڕوو شەممە، ئاشکرایکرد ئەو رووبەرە زەویە کە وە مدوو هیزگردن ئاگرەگەی ئێ کۆتاییە زەرەد دییە رەسیەس ئەرا نزیکەی 15 هەزار هێکتار،  وەپای مەزەنەیل  سەرەتاییەیل لە ناوەین دارستان و زەوییە کشاوەرزیەیل بەشەوبوینە.

وەڕێوەبەر نویسینگەی راگەیانن لە وەزارەتەگە، دیاب سخوری لە بەیانیگ تایوەت وەئاژانس شەفەق نیوز وت، " سەرشماری سیستیماتیکی رویبەرەیل زەرەد وەخوەی دی تەواو نەکریاگە، ئەوەگ ئیرنگە پشت وەپی بەسرێد رویپێوی سەرەتایی مەیدانییەیلە".

شمارەیگ لە پارێزگایەیل سوریا، وە تایوەت ناوچەیل باکوور و خوەرئاوا، لە مانگ تەمووز هیزگردن ئاگرەیل دوارەوبوی وەخوەیان دینە، لەناوەین بارودۆخ کەشوهەوای سەختیگ کە بەرزەوبوین فرەیگ پلەی گەرمی و وا هشگیگ گرێدەخوەی.