سووریا.. پەردبوین ئیسرائیلی و بومبەیل رووشنایی و فڕین فڕۆکەیل

شەفەق نیوز - دیمەشق

ناوچەیل ریف درعا و قونەیتەرە لە باشوور سووریا، شەو یەکشەممە، جۊلەیل سەربازی ئیسرائیلی وەخوەیان دین کە چگن وەرەو هشکانی و تەقانن دەیان بومب رووشنایی لەخوەی گرۆ، هاووەخت وەرد فڕین فڕۆکەیل چەودیاریکردن و بیفڕۆکەوان وەشیوەی خەسیگ لە ئاسمان ناوچەگە.

 پەیامنێر ئاژانس شەفەق نیوز لە دەیشتایی خوەراوای درعا، ئمڕوو دووشەممە، خەوەردا کە هیزیگ سەربازی ئیسرائیلی لە پەنج ماشین لە سەربازگەی جەزیرە کە لە خوەراوای ئاوایی مەعریەیە دزە کردنەسە ناو، وەرەو شمارەیگ لە ئاواییەیل و شوینە سەربازییەیل لە ناوچەگە.

 پەیامنێرمان دیاری کرد، کە هێزەگە چگە ناو ئاوایی مەعریە، و دۊاتر ئاوایی عابدین، تا رەسینە ئاوایی جوملە، کە لەورە چگنەسە ناو سڕییەیگ (بارەگایگ) سەربازی کە کەفێدە بان ری سەیسوون - جوملە، و ناسریاگە وە ناو "سڕییەی دووڵ" (سرية الوادي).

وتیش کە هێزەگە دۊاتر کشیاسەو وەرەو سەیسوون و کێڵگەی مسریتیە سودی، و لەورەیش ئەرا سەیدا حانووت، وەرجە ئەوەگ گلەو بخوەن ئەرا دەروازەی غیسار لەناو زەۊە داگیرکریاگەیل، کە لە خوەراوای سەیدا حانووت لە ریف قونەیتەرەی باشوورییە.

 هەمیش چەودیاری فڕین دوو فڕۆکەی بیفڕۆکەوان (درۆن) کریا لەبان ئاوایی جوملە لە ریف درعای خوەراوای.

 لە ریف قونەیتەرە، پەیامنێرمان خەوەردا کە هێزەیل داگیرکەر ئیسرائیلی دۊکە یەکشەممە لە ناوەین 40 تا 50 بۆمب رووشنایی و درەوشاوە وە شیوەیگ دووپاتەوبۊ تەقاننە لە ئاسمان ناوچەیل ریف باکووری و ناوڕاس، کە بۊە هووکار رووشنەوبۊن ئاسمان ناوچەگە وە تەواوی، و شارۆچکەیل برێقە و بیر عەجەم و دارستانەیل پارێزریای جوباتا خەشەب لەخوەی گرد، هاووەخت وەرد فڕین فڕۆکەیل چەودیاریکردن ئیسرائیلی لە ئاسمان ئەو ناوچە کە دریژەو بوود تا ریف درعای خوەراوای.

 لە ریف قونەیتەرەی ناوڕاس، هێزیگ سەربازی ئیسرائیلی، دۊکە یەکشەممە، کە لە چوار ماشین یا فرەتر بوین، چگە ناو بەرزایی تەل کرووم، لە نزیک ناوچەی جەبا.

 لە وەخت رمیان رژیم ئەسەد لە کانوون یەکەم/ دیسەمبەر 2024، ئیسرائیل ڕمیان رێککەفتن "جیاوەکردن هێزەیل" راگەیان کە لە ساڵ 1974 واژوو کریاۊد و ناوچە دابڕیایەگەی سووریا داگیر کرد.

 وەپەی ئامارە فەرمییەیل، سووریا لای کەم 2493 پێشێلکاری ئیسرائیلی وەخوەی دیە لە سەرەتای ساڵ 2026 تا 5 تشرین دۊیەم ئیسە.

 وەزارەت دەیشت سووریا شەرمەزار ئی جۊلەیلە کرد و وە پێشێلکاری ئەرا سەروەری و رێککەفتن ساڵ 1974 هەژماری کرد.