سوپای ئیسرائیل کوشتن فەرماندەی هیز قودس لە پەلاماری وەبان ئیران راگەینێد
شەفەق نيوز/ قسەکەر سوپای ئیسرائیل، ئمڕوو دووشەممە، راگەیان کە ئەو پەلامارەیل دویەکە وەلایەن چەک ئاسمانی ئیسرائیل، بوینە مدوو کوشیان فەرماندەی هیز قودس، و وەئامانجگردن 20 بارەگا لەناو ئیران.
قسەکەر سوپای ئیسرائیل لە قسەیلی ئەرا رووژنامەنویسەیل وت: 50 فرۆکە لە پەلامارەیل دویەکە وەبان ئیران بەشداری کرد، دووپاتیش کرد کە چەک ئاسمانی ئیسرائیل توانست شکست وە فرەی پەلامارەیل ئیران بارێد.
وتیش: ئەو پەلامارەیل ئیران کە دویەکە ئیسرائیل کردنە ئامانج، بوینە مدوو کوشیان شمارەیگ لە هاوڵاتیەیل و زەخمداری دەیان ترەک، وتیش: سوپای ئیسرائیل ئمڕوو نواگیری دوو درۆن کرد، یەکەمیان لە خوەرهوڵاتەو، و ئەوەکە لە جۆلان.
وتیش: تەل ئەبیب وەبان ئاسمان ئیران و زاڵە، و چەک ئاسمانی وەردەوامە لە جیوەجیکردن پلان جەنگ، و وەرەو خوەرھەڵات چوود ئەرا پەلاماردان توانایەیل ئەتۆمی و مووشەکی ئیران.
دووپاتیش کرد کە هیزەیل سوپا وەردەوامن لە ئۆپراسیۆنەیل وەرگریکردن لە جویراجویر بەرەیل جەنگ، لەلییان غەززە، کناراو خوەرئاوایی، و یەمەن، وتیش: سوپای ئیسرائیل کار کەێد ئەرا لاوردن هەڕەشەی ئیران لەبان ئیسرائیل.
هەرلیوا، سوپای ئیسرائیل، ئمڕوو دووشەممە، راگەیان کە توانست 4 وەرپرسەیل هەواڵگری لە ئیران بکوشێد، لەناویان سەرۆک دەزگای هەواڵگری لە سوپای پاسداران و جیرەگەی.
سوپای ئیسرائیل لە بەیاننامەیگ وت: فرۆکەیل جەنگی دویەکە پەلامار بینایگ دانە لە تەهران، بڕیگ وەرپرس لە دەزگای هەواڵگری رژیم ئیرانی لەناوی بوین.
وتیش: لە پەلامارەگە سەرۆک دەزگای هەواڵگری لە سوپای پاسداران ئیران و جیرەگەی وەگەرد سەروک دەزگای ھەواڵگری لە فەیلەق قودس و جیرەگەی کوشیان.
وتیش: ئەو چوار وەرپرسە، کاریگ مەرکەزی رانینە لە هەڵسەنگاندن رەوشەگە لەناو ئیران و پلانسازی ئەرا چالاکییەیل تیرۆری دژوە ئیسرائیل و خوەرئاوا و دەوڵەتەیل ناوچەگە.
