ئیسرائیل فڕۆکەخانەی رامۆن چووڵ کەێد دۊای زەۊلەرزەیگ وە هاز 4.4 پلە
شەفەق نیوز - خوەرهەڵات ناوڕاس
دەسەڵاتەیل ئیسرائیلی، رووژ چوارشەممە، فڕۆکەخانەی ناودەوڵەتی رامۆن لە نزیک شار ئیلات چووڵ کردن، دۊای كوتيان زەنگەیل هوشداری ئەرا هوشیارکردن لە زەۊلەرزەیگ کە هازی رەسیە نزیکەی 4.4 پلە لەبان پەیمانەی رێختەر، لە ریکاریگ خوەیپارێزی کە دۊرخستن گەشتیارەیل و کارمەندەیل لە بینایەیل فڕۆکەخانەگە لەخوەی گرد.
میدیایەیل راگەیانن ئیسرائیلی دیاری کردن کە زەۊلەرزەگە لە سەعات 11:25 شەوەکی رۊ دایە، کە یەیش هیشت دەسەڵاتەیل ریکارەیل فریاگوزاری کارا بکەن و بینایەیل فڕۆکەخانەگە چووڵ بکەن وەرەو ناوچە وازەیل، هاووەخت وەرد کوتیان زەنگەیل هوشداری لە شار ئیلات و ناوچەی وادی عەرەبە، کە هەردوگ ناوچەی بیر ئۆرا و ئیلیفازی شان فڕۆکەخانەگەیش لەخوەی گرد.
وەپەی زانیارییە سەرەتاییەیل ئەرا مەڵوەنەیل چەودیاریکردن زەۊلەرزە، سەنتەر زەۊلەرزەگە کەفتەسە ناوچەی سنووری ناوەین ئوردن و سعودیە و دەریای سوور، لە نزیک ناوچەی تابا لە باشوور سینا، و دانیشتگەیل ناوچە کەناراوی و سنوورییەیل دەورگرد کەنداو عەقەبە هەس وەپی کردنە.
تا ئیسە، هیچ راپۆرتەیل فەرمی نەڕەسینە لەباوەت رۊداین زەخمداری یا زیانەیل ماددی لە فڕۆکەخانەی رامۆن یا ناوچە نیشتەجیبۊنەیل دەورگردی، لە وەختیگ فەرماندەیی بەرەی ناوخۆیی داوا لە دانیشتگەیل کرد لە رەوش ئامادەباشی بمینن لەوەر خوەیئامادەکردن ئەرا لەرزەیل وەدۊاهاتگ ئەگەری.
سیستەم هوشیارکردن زۊینە وە زەۊلەرزەیل لە ئیسرائیل زەنگەیل هوشداری و ئاگادارکردنەیل لەڕی مۆبایلەیلەو کارا کەێد لە وەخت چەودیاریکردن زەۊلەرزەیلیگ کە هەوەجە وە هوشیاریکردن بکەێد، وەرد تەمەیکردن دانیشتگەیل ئەرا جیوەجیکردن ریکارەیل بیوەیی و چگن وەرەو شوینە وازەیل.
