پسپۆڕیگ وزە: تەقینەوەگەی بەیڕووت کاریگەری لە نرخ نەفت نەیرێد
شەفەق نیوز/ پسپۆڕیگ لە باوەتەیل وزە، ئمڕوو پەنجشەممە، دووپاتکرد ک تەقینەوەگەی بەندەر بەیرووت کاریگەری لەبان نرخەیل نەفت نێکەێد، و ئاماژەدا ک هاتنەوەی جووڵەی گواستنەوەی ئاسمانی ودەریایی بوودە هووکار لە زیایبوین داواکردن وزە و بەرزەوبوین نرخەیل نەفت.
فوڕات موسەوی ئەرا ئاژانس شەفەق نیوز وت: داوەزین یا بەرزەوبوین یا ئارامگردن نرخەیل نەفت وەگشتی پەیوەندی وە ئاڵشتبویەیلیگ دیرێد، گرنگتریان رێککەفتن دەوڵه‌تەگانە لە رێکخراو ئۆپیک، وئاست پابەندی و وەردەوامی دەوڵەتەگانی وەرێککەفتنەگە ک بڕیار کەمەوکردن بەرهەمهاوردن داگە، وهەمیش سووکەوکردن ریکارەیل قەیەغەگە لە جهان لەوەر پەتای کۆرۆنا.
وتیش: هاتنەوەی جووڵەی گواستنەوەی ئاسمانی ودەریایی لە جهان هاوکاری لە زیایبوین داواکردن وزە کەێد، ئیجا بەرزەوبوین نرخەیل نەفت، وکەمەوبوین پشتدەسەی نەفتی ئەمریکی وچینی، وکەمەوکردن لە نەفت هەل کریاگ لە بازاڕ وزەی جهانی هەڵبەت هیلێد داواکردن نەفت زیایەو بوود.
موسەوەی وتیش: ئاڵشبوینە سیاسیەگان لە ناوچەگە ولە جهان و کاریگەریە سیاسی و ئابووریەگانی لە دەوڵەتەیل جهان، کاریگەری لەبان نرخەیل نەفت دیرن چ وەخاس یا خراو، جوور سزا ئەمریکیەگان لەبان فەنزویلا وئیران، و جەنەگەگه‌ی لیبیا.
موسەوی هەمیش وت: لوبنان هیمان نووە لە بازاڕ نەفت وگاز، و هیچ قورسییگ نەیرێد لە بازاڕ وزەی جهانی، چوونکە نەکەفتیەسە ناو دەوڵەت بەرهەمکارەگان نەفت ک قورسی دیاریگ لە دیارکردن نرخ نەفت دیرن، بەڵکم شایەت بازاڕ وزەی جهانی کاریگەرییگ وەخوەی بوینێد، چ خاس بوود یا خراو، وەگورەی رووژەیل ئایندە لە کاریگەریەگان ئەو تەقینەوە.
