ئەردۆگان ئەنجامدان گفتوگۆ وەرد بەغداد و هەولێر راگەینێد لەباوەت رادەسکردن چەک پەکەکە

شەفەق نيوز/ رەجەب تەییب ئەردۆگان سەرۆک تورکیا، ئمڕوو شەممە، ئاشکرای ئەنجامدان گفتوگۆ وەرد بەغداد و هەولێر کرد، لەباوەت میکانیزمەیل رادەسکردن چەک پەکەکە.

 ئەردۆگان لە وتاریگ وەرجە گلەوخواردنی لە ئەلبانیا وت: تورکیا گفتوگۆ وەرد بەغداد و هەولێر لە عراق کەێد لەباوەت هویردەکاریەیل رادەسکردن چەک پەکەکە، ئەوەیش دویای بڕیار پەکەکە وە هەڵوەشانن خوەی لە هەفتەی گوزەشتە.

ئەردۆگان وتیش: گفتوگۆ وارم دەوڵەتەیل هاوسا وەڕیەو چوود لەبان چوینیەتی رادەسکردن چەک دەیشت سنوور ئیمە، پلان لەباوەت بەشداریکردن ئیدارەی بەغداد و هەولێر لەی کارە هەس.