دویەم فڕۆکەهەڵگر ئەمریکی رەسێدە خوەرهەڵات ناوڕاس
شەفەق نیوز/ سوپای ئەمەریکا راگەیان کە دویەم کەشتی فڕۆکەهەڵگر کە لەلایەن ئەمریکاو کلکریاس ئەرا خوەرهەڵات ناوڕاس ئەرا مقیەتیکردن ڕەوت بازرگانی رەسیەسە ناوچەگە، لە وەختیگ سوپای ئەمریک وە هەڵمەت خەسیگ پالامار حووسیەیل یەمەن ئەنجام دەێد.
فەرماندەیی ناوەندیی ئەمریکا لە بەیاننامەیگ لەبان پلاتفۆرم ئێکس وت: کەشتیی فڕۆکەهەڵگر USS Carl Vinson (CVN 70) و باڵە ئاسمانییەگەی کە فڕۆکە جەنگییەیل F-35C Lightning II هاناویان، شانوەشان کەشتیی فڕۆکەهەڵگر USS Harry S. Truman (CVN 75) لە ناوچەی وەرپرسیارێتی فەرماندەیی ناوەندی ئەمریکا کارکەن.
وە قسەی وەرپرسیگ سەربازی ئەمریکا، ئەمریکا لە ناوەڕاس مانگ ئازارەو دویای دەسکردن وە نوووترین هەڵمەت ئاسمانی لە دژ یاخیبویەیل سەروە ئیران، پەلامار زیاتر لە 100 ئامانج لە یەمەن داگە.
حوسییەبل ماوەیگە پەلامار کەشتییە جەنگییەیل ئەمریکا و ئیسرائیل دەن، ئەوەیش وەسنگ هاوسووزییان وەرد فەلەستینییەیل لە غەززە.
یاخیبویەیل دویای سەرهەڵدان جەنگ لە غەززە لە ئۆکتۆبەر ٢٠٢٣ دەسکردنە پەلاماردان کەشتیەیل دەریای سوور و کەنداو عەدەن و خاک ئیسرائیل، دویای ئاگربەسی لە کەرت غەززە لە مانگ یەک پەلامارەیل وسان.
ئیسرائیل لە سەرەتای مانگ ئازارەو گشت خوازینەیل لە غەززە بڕیە و لە 18ی ئازار دەسوە پەلامارەیلی وەبان ناوچەیل فەلەستین کردگە و کۆتایی وە ئاگربەسییگ کوڵ هاورد.
هەڵمەتە نووەگەی ئەمریکا دویای هەڕەشەیل حووسیەیل هات کە لەوەر کردەوەی ئیسرائیل وەبان غەززە دەسوە پەلامارەیلی کەێد.
