خانمە وەزیریگ ئەوروپی کەفێدە رز هاوخەمەیل ژینا ئەمینی

شەفەق نیوز/ حوجە لەحبیب خانمە وەزیر دەرەوەی بەلجیکا، لە دانیشتن ئەنجومەن نوینەرەیل، گیس خوەی ئەرا پشتگیریکردن ناڕەزایل ئیران بڕێد، ک دویای مردن مەهسا ئەمینی (ژینا) مەوقەی دەسگیرکردنی لەلایەن پۆلیس ئەخلاق گیانی لەدەسدا.

خانمە وەزیر بەلجیکا ک لە بنچینەی جەزائیریە، لەناو پەرلەمان بەلجیکا کەفتە رز ئەو خانمە وەرپرس و ئەسارە وناودیارەیلە ک گیس خوەیان وە پشتگیریکردن ژینا ئەمینی وناڕەزایل ئیران بڕین.

خانمە وەزیر بەلجیکا شەرمەزار رەفتار سەخت وتون و کوشتن و بڕین وەرد خوەینیشاندەرەیل لەلایەن رژیم ئیران کرد.

وتیش: ئەو کوشتن وبڕینە تا ئیسە نزیکەی ١٥٠ کوشیاگ لەلی بویەسەو، بیجگە سەدان لە زەخمدار و دەسوەسەر.